ru-e-rangin nazar aaya to chaman bhul gae

rū-e-rañgīñ nazar aayā to chaman bhuul ga.e

sūñgh kar zulf kī bū mushk-e-ḳhutan bhuul ga.e

ḳhvāb meñ dekh liye jab lab-o-dandān-e-nabī

la’al kā dhyān gayā durr-e-'adan bhuul ga.e

naa't goī meñ hue mahv to paayā vo maza

mā-sivā us ke kul aqsām-e-sukHan bhuul ga.e

kū-e-taiba meñ jo aa pahuñche 'anādil uḌ kar

dekh kar rañg-e-fazā yād-e-chaman bhuul ga.e

dar-badar ho ke dar-e-shāh pe jab jā pahuñche

ġham ġhalat ho gayā sab rañj-o-mehan bhuul ga.e

rauza-e-pāk pe pahuñche to ye ThanDak pahuñchī

soz-e-furqat na rahā dil kī jalan bhuul ga.e

'ishq-e-sarvar ne ye tāsīr dikhā.ī 'fā.iq'

sū-e-taiba jo chale hubb-e-vatan bhuul ga.e

ru-e-rangin nazar aaya to chaman bhul gae

sungh kar zulf ki bu mushk-e-KHutan bhul gae

KHwab mein dekh liye jab lab-o-dandan-e-nabi

la’al ka dhyan gaya durr-e-'adan bhul gae

na't goi mein hue mahw to paya wo maza

ma-siwa us ke kul aqsam-e-sukHan bhul gae

ku-e-taiba mein jo aa pahunche 'anadil uD kar

dekh kar rang-e-faza yaad-e-chaman bhul gae

dar-badar ho ke dar-e-shah pe jab ja pahunche

gham ghalat ho gaya sab ranj-o-mehan bhul gae

rauza-e-pak pe pahunche to ye ThanDak pahunchi

soz-e-furqat na raha dil ki jalan bhul gae

'ishq-e-sarwar ne ye tasir dikhai 'faiq'

su-e-taiba jo chale hubb-e-watan bhul gae