sab kahāñ kuchh lāla-o-gul meñ numāyāñ ho gaiñ

sab kahāñ kuchh lāla-o-gul meñ numāyāñ ho ga.iiñ

ḳhaak meñ kyā sūrateñ hoñgī ki pinhāñ ho ga.iiñ

yaad thiiñ ham ko bhī rañgā-rañg bazm-ārā.īyāñ

lekin ab naqsh-o-nigār-e-tāq-e-nisyāñ ho ga.iiñ

thiiñ banāt-un-nāsh-e-gardūñ din ko parde meñ nihāñ

shab ko un ke jī meñ kyā aa.ī ki uryāñ ho ga.iiñ

qaid meñ yāqūb ne lī go na yūsuf kī ḳhabar

lekin āñkheñ rauzan-e-dīvār-e-zindāñ ho ga.iiñ

sab raqīboñ se hoñ nā-ḳhush par zanān-e-misr se

hai zuleḳhā ḳhush ki mahv-e-māh-e-kan.āñ ho ga.iiñ

jū-e-ḳhūñ āñkhoñ se bahne do ki hai shām-e-firāq

maiñ ye samjhūñgā ki sham.eñ do farozāñ ho ga.iiñ

in parī-zādoñ se leñge ḳhuld meñ ham intiqām

qudrat-e-haq se yahī hūreñ agar vaañ ho ga.iiñ

niiñd us kī hai dimāġh us kā hai rāteñ us kī haiñ

terī zulfeñ jis ke baazū par pareshāñ ho ga.iiñ

maiñ chaman meñ kyā gayā goyā dabistāñ khul gayā

bulbuleñ sun kar mire naale ġhazal-ḳhvāñ ho ga.iiñ

vo nigāheñ kyuuñ huī jaatī haiñ yā-rab dil ke paar

jo mirī kotāhī-e-qismat se mizhgāñ ho ga.iiñ

bas-ki rokā maiñ ne aur siine meñ ubhrīñ pai-ba-pai

merī aaheñ baḳhiya-e-chāk-e-garebāñ ho ga.iiñ

vaañ gayā bhī maiñ to un kī gāliyoñ kā kyā javāb

yaad thiiñ jitnī duā.eñ sarf-e-darbāñ ho ga.iiñ

jāñ-fizā hai baada jis ke haath meñ jaam aa gayā

sab lakīreñ haath kī goyā rag-e-jāñ ho ga.iiñ

ham muvahhid haiñ hamārā kesh hai tark-e-rūsūm

millateñ jab miT ga.iiñ ajzā-e-īmāñ ho ga.iiñ

rañj se ḳhūgar huā insāñ to miT jaatā hai rañj

mushkileñ mujh par paḌīñ itnī ki āsāñ ho ga.iiñ

yuuñ hī gar rotā rahā 'ġhālib' to ai ahl-e-jahāñ

dekhnā in bastiyoñ ko tum ki vīrāñ ho ga.iiñ

sab kahāñ kuchh lāla-o-gul meñ numāyāñ ho gaiñ

ḳhak meñ kyā sūrateñ hoñgī ki pinhāñ ho gaiñ

yaad thiñ hum ko bhī rañgā-rañg bazm-ārāīyāñ

lekin ab naqsh-o-nigār-e-tāq-e-nisyāñ ho gaiñ

thiñ banāt-un-nāsh-e-gardūñ din ko parde meñ nihāñ

shab ko un ke jī meñ kyā aaī ki uryāñ ho gaiñ

qaid meñ yāqūb ne lī go na yūsuf kī ḳhabar

lekin āñkheñ rauzan-e-dīwār-e-zindāñ ho gaiñ

sab raqīboñ se hoñ nā-ḳhush par zanān-e-misr se

hai zuleḳhā ḳhush ki mahw-e-māh-e-kanāñ ho gaiñ

jū-e-ḳhūñ āñkhoñ se bahne do ki hai shām-e-firāq

maiñ ye samjhūñgā ki shameñ do farozāñ ho gaiñ

in parī-zādoñ se leñge ḳhuld meñ hum intiqām

qudrat-e-haq se yahī hūreñ agar wañ ho gaiñ

niñd us kī hai dimāġh us kā hai rāteñ us kī haiñ

terī zulfeñ jis ke bazū par pareshāñ ho gaiñ

maiñ chaman meñ kyā gayā goyā dabistāñ khul gayā

bulbuleñ sun kar mere nale ġhazal-ḳhwāñ ho gaiñ

wo nigāheñ kyuñ huī jatī haiñ yā-rab dil ke par

jo mirī kotāhī-e-qismat se mizhgāñ ho gaiñ

bas-ki rokā maiñ ne aur sine meñ ubhrīñ pai-ba-pai

merī aaheñ baḳhiya-e-chāk-e-garebāñ ho gaiñ

wañ gayā bhī maiñ to un kī gāliyoñ kā kyā jawāb

yaad thiñ jitnī duāeñ sarf-e-darbāñ ho gaiñ

jāñ-fizā hai baada jis ke hath meñ jam aa gayā

sab lakīreñ hath kī goyā rag-e-jāñ ho gaiñ

hum muwahhid haiñ hamārā kesh hai tark-e-rūsūm

millateñ jab miT gaiñ ajzā-e-īmāñ ho gaiñ

rañj se ḳhūgar huā insāñ to miT jatā hai rañj

mushkileñ mujh par paḌīñ itnī ki āsāñ ho gaiñ

yuñ hī gar rotā rahā 'ġhālib' to ai ahl-e-jahāñ

dekhnā in bastiyoñ ko tum ki wīrāñ ho gaiñ