satāish-gar hai zāhid is qadar jis bāġh-e-rizwāñ kā

satā.ish-gar hai zāhid is qadar jis bāġh-e-rizvāñ kā

vo ik guldasta hai ham be-ḳhudoñ ke tāq-e-nisyāñ kā

bayāñ kyā kījiye be-dād-e-kāvish-hā-e-mizhgāñ kā

ki har yak qatra-e-ḳhūñ daana hai tasbīh-e-marjāñ kā

na aa.ī satvat-e-qātil bhī maane mere nāloñ ko

liyā dāñtoñ meñ jo tinkā huā resha niyastāñ kā

dikhā.ūñgā tamāshā dī agar fursat zamāne ne

mirā har dāġh-e-dil ik tuḳhm hai sarv-e-charāġhāñ kā

kiyā ā.īna-ḳhāne kā vo naqsha tere jalve ne

kare jo partav-e-ḳhurshīd aalam shabnamistāñ kā

mirī ta.amīr meñ muzmar hai ik sūrat ḳharābī kī

hayūlā barq-e-ḳhirman kā hai ḳhūn-e-garm dahqāñ kā

ugā hai ghar meñ har sū sabza vīrānī tamāshā kar

madār ab khodne par ghaas ke hai mere darbāñ kā

ḳhamoshī meñ nihāñ ḳhūñ-gashta lākhoñ ārzūeñ haiñ

charāġh-e-murdā huuñ maiñ be-zabāñ gor-e-ġharībāñ kā

hanūz ik partav-e-naqsh-e-ḳhayāl-e-yār baaqī hai

dil-e-afsurda goyā hujra hai yūsuf ke zindāñ kā

baġhal meñ ġhair kī aaj aap sote haiñ kahīñ varna

sabab kyā ḳhvāb meñ aa kar tabassum-hā-e-pinhāñ kā

nahīñ ma.alūm kis kis kā lahū paanī huā hogā

qayāmat hai sarishk-ālūda honā terī mizhgāñ kā

nazar meñ hai hamārī jāda-e-rāh-e-fanā 'ġhālib'

ki ye shīrāza hai aalam ke ajzā-e-pareshāñ kā

satāish-gar hai zāhid is qadar jis bāġh-e-rizwāñ kā

wo ek guldasta hai hum be-ḳhudoñ ke tāq-e-nisyāñ kā

bayāñ kyā kījiye be-dād-e-kāwish-hā-e-mizhgāñ kā

ki har yak qatra-e-ḳhūñ dana hai tasbīh-e-marjāñ kā

na aaī satwat-e-qātil bhī mane mere nāloñ ko

liyā dāñtoñ meñ jo tinkā huā resha niyastāñ kā

dikhāūñgā tamāshā dī agar fursat zamāne ne

mirā har dāġh-e-dil ek tuḳhm hai sarw-e-charāġhāñ kā

kiyā āīna-ḳhāne kā wo naqsha tere jalwe ne

kare jo partaw-e-ḳhurshīd aalam shabnamistāñ kā

mirī tamīr meñ muzmar hai ek sūrat ḳharābī kī

hayūlā barq-e-ḳhirman kā hai ḳhūn-e-garm dahqāñ kā

ugā hai ghar meñ har sū sabza wīrānī tamāshā kar

madār ab khodne par ghas ke hai mere darbāñ kā

ḳhamoshī meñ nihāñ ḳhūñ-gashta lākhoñ ārzūeñ haiñ

charāġh-e-murdā huñ maiñ be-zabāñ gor-e-ġharībāñ kā

hanūz ek partaw-e-naqsh-e-ḳhayāl-e-yār baqī hai

dil-e-afsurda goyā hujra hai yūsuf ke zindāñ kā

baġhal meñ ġhair kī aaj aap sote haiñ kahīñ warna

sabab kyā ḳhwāb meñ aa kar tabassum-hā-e-pinhāñ kā

nahīñ malūm kis kis kā lahū panī huā hogā

qayāmat hai sarishk-ālūda honā terī mizhgāñ kā

nazar meñ hai hamārī jāda-e-rāh-e-fanā 'ġhālib'

ki ye shīrāza hai aalam ke ajzā-e-pareshāñ kā