sataish-gar hai zahid is qadar jis bagh-e-rizwan ka

satā.ish-gar hai zāhid is qadar jis bāġh-e-rizvāñ kā

vo ik guldasta hai ham be-ḳhudoñ ke tāq-e-nisyāñ kā

bayāñ kyā kījiye bedād kāvish hā-e-mizhgāñ kā

ki har yak qatra-e-ḳhūñ daana hai tasbīh-e-marjāñ kā

na aa.ī satvat bhī bhī māne.a mere ko ko

liyā dāñtoñ meñ jo tinkā huā resha niyastāñ kā

dukhā.ūñgā tamāshā dī agar fursat zamāne ne

mirā har dāġh-e-dil ik hai sarv-e-charāġhāñ kā

kiyā ā.īna-ḳhāne kā vo naqsha tere jalve ne

kare jo partav-e-ḳhurshīd 'ālam shabnamistāñ kā

mirī tā'mīr meñ muzmar hai ik sūrat ḳharābī kī

hayūlā barq-e-ḳhirman kā hai ḳhūn-e-garm dahqāñ kā

ugā hai ghar meñ har sū sabza vīrānī tamāshā kar

madār ab khodne par ghaas ke hai mere darbāñ kā

ḳhamoshī meñ nihāñ ḳhūñ-gashta lākhoñ ārzūeñ haiñ

charāġh-e-murdā huuñ maiñ be-zabāñ gor-e-ġharībāñ kā

hanūz ik partav-e-naqsh-e-ḳhayāl-e-yār baaqī hai

dil-e-afsurda goyā hujra hai yūsuf ke zindāñ kā

baġhal meñ ġhair kī aaj aap sote haiñ kahīñ varna

sabab kyā ḳhvāb meñ aa kar tabassum-hā-e-pinhāñ kā

nahīñ mā'lūm kis kis kā lahū paanī huā hogā

qayāmat hai sarishk-ālūda honā terī mizhgāñ kā

nazar meñ hai hamārī jāda-e-rāh-e-fanā 'ġhālib'

ki ye shīrāza hai 'ālam ke ajzā-e-pareshāñ kā

sataish-gar hai zahid is qadar jis bagh-e-rizwan ka

wo ek guldasta hai hum be-KHudon ke taq-e-nisyan ka

bayan kya kijiye bedad kawish ha-e-mizhgan ka

ki har yak qatra-e-KHun dana hai tasbih-e-marjaan ka

na aai satwat bhi bhi manea mere ko ko

liya danton mein jo tinka hua resha niyastan ka

dukhaunga tamasha di agar fursat zamane ne

mera har dagh-e-dil ek hai sarw-e-charaghan ka

kiya aaina-KHane ka wo naqsha tere jalwe ne

kare jo partaw-e-KHurshid 'alam shabnamistan ka

meri ta'mir mein muzmar hai ek surat KHarabi ki

hayula barq-e-KHirman ka hai KHun-e-garm dahqan ka

uga hai ghar mein har su sabza virani tamasha kar

madar ab khodne par ghas ke hai mere darban ka

KHamoshi mein nihan KHun-gashta lakhon aarzuen hain

charagh-e-murda hun main be-zaban gor-e-ghariban ka

hanuz ek partaw-e-naqsh-e-KHayal-e-yar baqi hai

dil-e-afsurda goya hujra hai yusuf ke zindan ka

baghal mein ghair ki aaj aap sote hain kahin warna

sabab kya KHwab mein aa kar tabassum-ha-e-pinhan ka

nahin ma'lum kis kis ka lahu pani hua hoga

qayamat hai sarishk-aluda hona teri mizhgan ka

nazar mein hai hamari jada-e-rah-e-fana 'ghaalib'

ki ye shiraaza hai 'alam ke ajza-e-pareshan ka