said-e-nigah-e-naz mein aawaz kahan hai

said-e-nigah-e-nāz meñ āvāz kahāñ hai

ye kaun batā.e nigah-e-nāz kahāñ hai

duniyā mirī ham-rañg-o-ham-āvāz kahāñ hai

laanā vo mirā soz-bharā saaz kahāñ hai

ab fursat-e-nazāra hai sahrā-o-chaman meñ

ab dast-e-junūñ ḳhāna-bar-andāz kahāñ hai

anjām-e-vafā aur ye ālām-e-musalsal

vo ishrat-e-yak-lamha-e-āġhāz kahāñ hai

'sīmāb' kahāñ huuñ maiñ kareñ ġhaur na is par

ahbāb ye dekheñ mirī āvāz kahāñ hai

said-e-nigah-e-naz mein aawaz kahan hai

ye kaun batae nigah-e-naz kahan hai

duniya meri ham-rang-o-ham-awaz kahan hai

lana wo mera soz-bhara saz kahan hai

ab fursat-e-nazara hai sahra-o-chaman mein

ab dast-e-junun KHana-bar-andaz kahan hai

anjam-e-wafa aur ye aalam-e-musalsal

wo ishrat-e-yak-lamha-e-aghaz kahan hai

'simab' kahan hun main karen ghaur na is par

ahbab ye dekhen meri aawaz kahan hai