braham mizaj-e-alam-e-imkan hai aaj-kal

braham mizāj-e-ālam-e-imkāñ hai āj-kal

jo mutma.in hai vo bhī pareshāñ hai āj-kal

ye intihā-e-gardish-e-daurāñ hai āj-kal

insāñ kā ḳhuun ḳhaak se arzāñ hai āj-kal

shorish gah-e-hayāt kī āvezisheñ na pūchh

dil se dimāġh dast-o-garebāñ hai āj-kal

kāñToñ ke sar haiñ ḳhuun kī bārish se lāla-gūñ

rañgīñ bisāt-e-dasht-o-bayābāñ hai āj-kal

tārīkH-e-asr yaad karegī tamām umr

'sīmāb' jis adā se ġhazal-ḳhvāñ hai āj-kal

braham mizaj-e-alam-e-imkan hai aaj-kal

jo mutmain hai wo bhi pareshan hai aaj-kal

ye intiha-e-gardish-e-dauran hai aaj-kal

insan ka KHun KHak se arzan hai aaj-kal

shorish gah-e-hayat ki aawezishen na puchh

dil se dimagh dast-o-gareban hai aaj-kal

kanTon ke sar hain KHun ki barish se lala-gun

rangin bisat-e-dasht-o-bayaban hai aaj-kal

tarikH-e-asr yaad karegi tamam umr

'simab' jis ada se ghazal-KHwan hai aaj-kal