nahin sunte kahani sakinan-e-la-makan meri

nahīñ sunte kahānī sākinān-e-lā-makāñ merī

tumhīñ sun lo kisī din banda-parvar dāstāñ merī

falak ghabrā gayā hai girya-e-be-ikHtiyārī se

isī Dar se nahīñ suntā hai zālim dāstāñ merī

’ajab kyā hai ki dil us sañg-e-dil se mom ho jaa.e

ki fariyād-o-fuġhāñ kī ham-navā hai dāstāñ merī

zamīñ par haiñ mire qisse falak par haiñ mire charche

yahāñ bhī dāstāñ merī vahāñ bhī dāstāñ merī

hasīñ haiñ mah-jabīñ haiñ dil-rubā haiñ rahm-dil bhī haiñ

magar Darte haiñ vo sunte nahīñ haiñ dāstāñ merī

'adū kī anjuman-ārā.iyāñ ye saaf kahtī haiñ

ki hai in mahfiloñ kī jaan goyā dāstāñ merī

vo din bhī aane vaalā hai vo shab bhī aane vaalī hai

sunā.egā tumheñ dil taḳhliya meñ dāstāñ merī

kahānī merī sun sun kar vo be-ḳhud hote jaate haiñ

ki hai Duubī huī rañg-e-asar meñ dāstāñ merī

falak āñkheñ churātā hai vo but āñkheñ dikhātā hai

vo suntā hai nahīñ suntā ye zālim dāstāñ merī

maiñ kahtā huuñ vo sunte haiñ vo kahte haiñ maiñ suntā huuñ

mirā qissa hai un kā un kā qissa dāstāñ merī

fasāna dil kā ab jā kar huā hai dil-nashīñ un ke

na bhūle haiñ na bhūleñge kabhī ab dāstāñ merī

sar-e-mahfil jo sham-e-anjuman aañsū bahātī hai

magar yaad aa ga.ī hai us ko pichhlī dāstāñ merī

ḳhamoshī se kabhī goyā.ī se sargoshiyāñ kī haiñ

vahī mazmūn-e-sar-basta hai goyā dāstāñ merī

maiñ un kī ḳhvāb-gah tak sar ke bal jā.ūñgā ai 'mohsin'

unheñ sunñī paḌegī taḳhliya meñ dāstāñ merī

nahin sunte kahani sakinan-e-la-makan meri

tumhin sun lo kisi din banda-parwar dastan meri

falak ghabra gaya hai girya-e-be-ikHtiyari se

isi Dar se nahin sunta hai zalim dastan meri

’ajab kya hai ki dil us sang-e-dil se mom ho jae

ki fariyaad-o-fughan ki ham-nawa hai dastan meri

zamin par hain mere qisse falak par hain mere charche

yahan bhi dastan meri wahan bhi dastan meri

hasin hain mah-jabin hain dil-ruba hain rahm-dil bhi hain

magar Darte hain wo sunte nahin hain dastan meri

'adu ki anjuman-araiyan ye saf kahti hain

ki hai in mahfilon ki jaan goya dastan meri

wo din bhi aane wala hai wo shab bhi aane wali hai

sunaega tumhein dil taKHliya mein dastan meri

kahani meri sun sun kar wo be-KHud hote jate hain

ki hai Dubi hui rang-e-asar mein dastan meri

falak aankhen churaata hai wo but aankhen dikhata hai

wo sunta hai nahin sunta ye zalim dastan meri

main kahta hun wo sunte hain wo kahte hain main sunta hun

mera qissa hai un ka un ka qissa dastan meri

fasana dil ka ab ja kar hua hai dil-nashin un ke

na bhule hain na bhulenge kabhi ab dastan meri

sar-e-mahfil jo sham-e-anjuman aansu bahati hai

magar yaad aa gai hai us ko pichhli dastan meri

KHamoshi se kabhi goyai se sargoshiyan ki hain

wahi mazmun-e-sar-basta hai goya dastan meri

main un ki KHwab-gah tak sar ke bal jaunga ai 'mohsin'

unhen sunni paDegi taKHliya mein dastan meri