faqir-e-be-nawa ka saz-o-saman dekhte jao

faqīr-e-be-navā kā sāz-o-sāmāñ dekhte jaao

ki shān-e-faqr-o-fakHrī hai numāyāñ ho jaao

diloñ ke ġhunche jin ko phuul hone kī tamannā thī

khile haiñ aaj vo gul-hā-e-armāñ ho jaao

na dekhā hogā koī baaġh us nuzhat kā 'ālam meñ

mire dil meñ hai vo gulzār-e-rizvāñ ho jaao

faqīr-e-be-navā huuñ bul-'ulā kā naam levā huuñ

ḳhudā rakkhe mirī ġhurbat ke sāmāñ dekhte jaao

faqīrāna ravish rakhtā huuñ nafrat hai imārat se

magar raushan hai dil meñ sham’-e-īmāñ dekhte jaao

nazar meñ vādī-e-aiman kā naqsha phirne lagtā hai

shab-e-’urs aaj hai vatan-e-charāġhāñ dekhte jaao

sar-e-mahfil tamāsha ho rahā hai raqs-e-bismil kā

kiyā hai dil ne ye kār-e-numāyāñ dekhte jaao

kiye haiñ kaise sāmāñ dil-farebī ke ġharīboñ ne

koī dekhe na dekhe tum to ai jaañ ho jaao

husain ibn-e-alī ke lāDle haiñ bul-'ulā 'mohsin'

ye haqq haiñ ā.īna ai ahl-e-'irfāñ dekhte jaao

faqir-e-be-nawa ka saz-o-saman dekhte jao

ki shan-e-faqr-o-fakHri hai numayan ho jao

dilon ke ghunche jin ko phul hone ki tamanna thi

khile hain aaj wo gul-ha-e-arman ho jao

na dekha hoga koi bagh us nuzhat ka 'alam mein

mere dil mein hai wo gulzar-e-rizwan ho jao

faqir-e-be-nawa hun bul-'ula ka nam lewa hun

KHuda rakkhe meri ghurbat ke saman dekhte jao

faqirana rawish rakhta hun nafrat hai imarat se

magar raushan hai dil mein sham’-e-iman dekhte jao

nazar mein wadi-e-aiman ka naqsha phirne lagta hai

shab-e-’urs aaj hai watan-e-charaghan dekhte jao

sar-e-mahfil tamasha ho raha hai raqs-e-bismil ka

kiya hai dil ne ye kar-e-numayan dekhte jao

kiye hain kaise saman dil-farebi ke gharibon ne

koi dekhe na dekhe tum to ai jaan ho jao

husain ibn-e-ali ke laDle hain bul-'ula 'mohsin'

ye haqq hain aaina ai ahl-e-'irfan dekhte jao