اس بزم کا تھا طرفہ عالم ہر کام زمانہ بھول گیا

اس بزم کا تھا طرفہ عالم ہر کام زمانہ بھول گیا

وہ ہوش میں لانا بھول گیے میں ہوش میں آنا بھول گیا

ان کے تو کرم کا کیا کہنا جلوے تھے نمایاں چار طرف

یہ میری خطا ہے میری خطا نظروں کو اٹھانا بھول گیا

اس مست نظر کے اٹھتے ہی گم ہو گئی میری عقل و خرد

دنیا کی کہانی یاد رہی اپنا ہی فسانہ بھول گیا

پہلے تو یہ سوچا تھا میں نے اشکوں سے بجھا لوں گا سب کچھ

جب آگ کے شعلے بھڑکنے لگے میں آگ بجھانا بھول گیا

گھیرا مجھے اک حیرانی نے کھویا مجھے اک تابانی نے

جلوؤں کا کچھ ایسا عالم تھا نظروں کو بچانا بھول گیا

اے رازؔ حقیقت تو یہ ہے وہ پردہ دری کب چاہتے ہیں

جس راز کو میں کہہ بیٹھا تھا وہ راز زمانہ بھول گیا