ye kaun aa gaya hai nazar to uThana

ye kaun aa gayā hai nazar to uThānā

ki rañgīñ huā jā rahā hai zamāna

fazā.eñ mo'attar huī jā rahī haiñ

havāoñ kā andāz hai muslihāna

ye chehra hai yā māhtāb-e-tamāmī

ye 'āriz haiñ yā rañg kā hai ḳhazāna

laboñ par hai lā'l-e-badaḳhshāñ kā 'ālam

jinheñ dekh kar kho rahā hai zamāna

zahe tāb-e-dandāñ ḳhushā rañg-e-dandāñ

unhīñ kī chamak se huā dil nishāna

vo nazreñ ki jin meñ sad andāz-e-afsōuñ

vo gesū ki jo haiñ shabīh-e-shabāna

vo āñkheñ jinheñ sāġhar-o-jām kahiye

yagāna haiñ lekin nahīñ haiñ yagāna

vo paikar ke jo rashk sarv-e-sahī hai

vo raftār-e-pāmāl jis se zamāna

tabassum qayāmat nigāheñ qayāmat

har andāz kā hai qayāmat bahāna

vo andāz nāzuk ki jis par tasadduq

mirī ārzū-e-dilī kā fasāna

ye ai 'rāz' maiñ rāz-e-dil kah rahā huuñ

zamāna samajhtā hai us ko fasāna

ye kaun aa gaya hai nazar to uThana

ki rangin hua ja raha hai zamana

fazaen mo'attar hui ja rahi hain

hawaon ka andaz hai muslihana

ye chehra hai ya mahtab-e-tamami

ye 'ariz hain ya rang ka hai KHazana

labon par hai la'l-e-badaKHshan ka 'alam

jinhen dekh kar kho raha hai zamana

zahe tab-e-dandan KHusha rang-e-dandan

unhin ki chamak se hua dil nishana

wo nazren ki jin mein sad andaz-e-afsooun

wo gesu ki jo hain shabih-e-shabana

wo aankhen jinhen saghar-o-jam kahiye

yagana hain lekin nahin hain yagana

wo paikar ke jo rashk sarw-e-sahi hai

wo raftar-e-pamal jis se zamana

tabassum qayamat nigahen qayamat

har andaz ka hai qayamat bahana

wo andaz nazuk ki jis par tasadduq

meri aarzu-e-dili ka fasana

ye ai 'raaz' main raaz-e-dil kah raha hun

zamana samajhta hai us ko fasana