جب سے کہ پلا دی ہے اے ساقیِ مستانہ

جب سے کہ پلا دی ہے اے ساقیِ مستانہ

صورت بنی شاہانہ انداز فقیرانہ

کیا تجھ کو خبر زاہد اس رمزِ حقیقت کی

صد زہد کا حاصل ہے اک لغزشِ مستانہ

نظریں ہی پلاتی ہیں نظریں ہی چھکاتی ہیں

ساقی ہے نہ میکش ہے ساغر ہے نہ میخانہ

جس قلبِ شکستہ کی تم نذر نہیں لیتے

ثابت تھا کبھی یہ بھی ٹوٹا ہوا پیمانہ

گر چشمِ حقیقت ہو گر دیدۂ بینا ہو

بت خانہ ہی کعبہ ہے ہے کعبہ ہی بت خانہ

اے شمعِ حقیقت میں تو کس کو جلاتی ہے

خود اپنی حقیقت سے واقف نہیں پروانہ

خاموشی ہے گویائی گویائی ہے خاموشی

میں رازؔ سمجھتا ہوں رازِ درِ جانانہ