jab se ki pila di hai ai saqi-e-mastana

jab se ki pilā dī hai ai sāqī-e-mastāna

sūrat banī shāhāna andāz-e-faqīrānā

kyā tujh ko ḳhabar zāhid us ramz-e-haqīqat kī

sad zohd kā hāsil hai ik laġhzish-e-mastāna

nazreñ hī pilātī haiñ nazreñ hī chhakātī haiñ

saaqī hai na mai-kash hai sāġhar hai na mai-ḳhāna

jis qalb-e-shikasta kī tum nazr nahīñ lete

sābit thā kabhī ye bhī TuuTā huā paimāna

gar chashm-e-haqīqat ho gar dīda-e-bianā ho

but-ḳhāna hī kā'ba hai hai kā'ba hī but-ḳhāna

ai sham'-e-haqīqat meñ tū kis ko jalātī hai

ḳhud apnī haqīqat se vāqif nahīñ parvāna

ḳhāmoshī hai goyā.ī goyā.ī hai ḳhāmoshī

maiñ 'rāz' samajhtā huuñ rāz-e-dar-e-jānāna

jab se ki pila di hai ai saqi-e-mastana

surat bani shahana andaz-e-faqirana

kya tujh ko KHabar zahid us ramz-e-haqiqat ki

sad zohd ka hasil hai ek laghzish-e-mastana

nazren hi pilati hain nazren hi chhakati hain

saqi hai na mai-kash hai saghar hai na mai-KHana

jis qalb-e-shikasta ki tum nazr nahin lete

sabit tha kabhi ye bhi TuTa hua paimana

gar chashm-e-haqiqat ho gar dida-e-biana ho

but-KHana hi ka'ba hai hai ka'ba hi but-KHana

ai sham'-e-haqiqat mein tu kis ko jalati hai

KHud apni haqiqat se waqif nahin parwana

KHamoshi hai goyai goyai hai KHamoshi

main 'raaz' samajhta hun raaz-e-dar-e-jaanana