saqi ki har nigah pe bal kha ke pi gaya

saaqī kī har nigāh pe bal khā ke pī gayā

lahroñ se kheltā huā lahrā ke pī gayā

be-kaifiyoñ ke kaif se ghabrā ke pī gayā

tauba ko tauba taaḌ ke tharrā ke pī gayā

zāhid ye merī shoḳhī-e-rindāna dekhnā

rahmat ko bātoñ-bātoñ meñ bahlā ke pī gayā

sarmastī-e-azal mujhe jab yaad aa ga.ī

duniyā-e-e’atibār ko Thukrā ke pī gayā

āzurdagī-e-kHātir-e-sāqī ko dekh kar

mujh ko ye sharm aa.ī ki sharmā ke pī gayā

ai rahmat-e-tamām merī har ḳhatā-mu’āf

maiñ intihā-e-shauq meñ ghabrā ke pī gayā

piitā baġhair izn ye kab thī mirī majāl

dar parda chashm-e-yār kī shah pā ke pī gayā

is jān-e-mai-kada kī qasam bārhā 'jigar'

kal 'ālam-e-basīt pe maiñ chhā ke pī gayā

saqi ki har nigah pe bal kha ke pi gaya

lahron se khelta hua lahra ke pi gaya

be-kaifiyon ke kaif se ghabra ke pi gaya

tauba ko tauba taD ke tharra ke pi gaya

zahid ye meri shoKHi-e-rindana dekhna

rahmat ko baaton-baaton mein bahla ke pi gaya

sarmasti-e-azal mujhe jab yaad aa gai

duniya-e-e’atibar ko Thukra ke pi gaya

aazurdagi-e-kHatir-e-saqi ko dekh kar

mujh ko ye sharm aai ki sharma ke pi gaya

ai rahmat-e-tamam meri har KHata-mu’af

main intiha-e-shauq mein ghabra ke pi gaya

pita baghair izn ye kab thi meri majal

dar parda chashm-e-yar ki shah pa ke pi gaya

is jaan-e-mai-kada ki qasam barha 'jigar'

kal 'alam-e-basit pe main chha ke pi gaya