sune kaun qissa-e-dard-e-dil mera gham-gusar chala gaya

sune kaun qissa-e-dard-e-dil merā ġham-gusār chalā gayā

jise āshnāoñ kā paas thā vo vafā-shi’ār chalā gayā

vahī bazm hai vahī dhuum hai vahī 'āshiqoñ kā hujūm hai

hai kamī to bas mere chāñd kī jo tah-e-mazār chalā gayā

vo suḳhan-shanās vo dūr-bīñ vo gadā-navāz vo mah-jabīñ

vo hasīñ vo bahr-e-'ulūm-e-dīñ merā tājdār chalā gayā

kahāñ ab suḳhan meñ vo garmiyāñ ki nahīñ rahā koī qadr-dāñ

kahāñ ab vo shauq meñ mastiyāñ ki vo pur-vaqār chalā gayā

jise maiñ sunātā thā dard-e-dil vo jo pūchhtā thā ġham-e-darūñ

vo gadā-navāz bichhaḌ gayā vo 'atā-shi’ār chalā gayā

bahe kyuuñ 'nasīr' na ashk-e-ġham rahe kyuuñ na lab par mere fuġhāñ

hameñ be-qarār vo chhoḌkar sar-e-rāh-guzār chalā gayā

sune kaun qissa-e-dard-e-dil mera gham-gusar chala gaya

jise aashnaon ka pas tha wo wafa-shi’ar chala gaya

wahi bazm hai wahi dhum hai wahi 'ashiqon ka hujum hai

hai kami to bas mere chand ki jo tah-e-mazar chala gaya

wo suKHan-shanas wo dur-bin wo gada-nawaz wo mah-jabin

wo hasin wo bahr-e-'ulum-e-din mera tajdar chala gaya

kahan ab suKHan mein wo garmiyan ki nahin raha koi qadr-dan

kahan ab wo shauq mein mastiyan ki wo pur-waqar chala gaya

jise main sunata tha dard-e-dil wo jo puchhta tha gham-e-darun

wo gada-nawaz bichhaD gaya wo 'ata-shi’ar chala gaya

bahe kyun 'nasir' na ashk-e-gham rahe kyun na lab par mere fughan

hamein be-qarar wo chhoDkar sar-e-rah-guzar chala gaya