ٹھہری مری حقیقت جب اصل نور تیرا

ٹھہری مری حقیقت جب اصل نور تیرا

پھر یہ ظہور میرا ہوگا ظہور تیرا

میرا کہاں نشاں تھا تیری جہاں تھی ہستی

بن آیا میری صورت خود یار نور تیرا

کیوں پاک ہم نہ ہوویں آلودگیِ جاں سے

ساقی سے پی لیا ہے جامِ طہور تیرا

موسیٰ ہی کی بدولت تجھ کو ہوئی تجلی

ہرگز یہ منہ نہیں تھا اے سنگِ طور تیرا

نبیوں نے خود بتایا ولیوں نے کہہ سنایا

سمجھے نہ منکر اب تک سرِ ظہور تیرا

بے بود سارا عالم با بود ایک تو ہے

ظاہر ہوا اسدؔ پر رازِ ظہور تیرا