jis ka dil jam-e-fana se har ghaDi sarshaar hai

jis kā dil jām-e-fanā se har ghaḌī sarshār hai

us kī sūrat hai kahāñ vo sūrat-e-dildār hai

aisī tanhā.ī milī rāh-e-haqīqat meñ hameñ

yās-o-hasrat ke sivā koī nahīñ ġham-ḳhvār hai

ham to haiñ dair-o-haram meñ ek sūrat dekhte

tum meñ ai shaiḳh-o-barhaman kis liye takrār hai

kyuuñ kiyā hai tū ne mai-ḳhāne ke darvāze ko band

aaj kyā aayā nahīñ saaqī koī mai-ḳhvār hai

sar ko na kaTvātā gar ramz-e-fanā ko jāntā

kab kamāl-e-'ishq meñ mansūr to hoshiyār hai

jis ko āzādī milī hai 'ishq meñ phir vo mudām

kā'ba-o-but-ḳhāna meñ phirtā qalandar-vār hai

qum bi-iznī shams-e-dīñ kā haq hai kahnā ai 'asad'

ġhain jab gum ho ga.ī tab 'ain kā iz.hār hai

jis ka dil jam-e-fana se har ghaDi sarshaar hai

us ki surat hai kahan wo surat-e-dildar hai

aisi tanhai mili rah-e-haqiqat mein hamein

yas-o-hasrat ke siwa koi nahin gham-KHwar hai

hum to hain dair-o-haram mein ek surat dekhte

tum mein ai shaiKH-o-barhaman kis liye takrar hai

kyun kiya hai tu ne mai-KHane ke darwaze ko band

aaj kya aaya nahin saqi koi mai-KHwar hai

sar ko na kaTwata gar ramz-e-fana ko jaanta

kab kamal-e-'ishq mein mansur to hoshiyar hai

jis ko aazadi mili hai 'ishq mein phir wo mudam

ka'ba-o-but-KHana mein phirta qalandar-war hai

qum bi-izni shams-e-din ka haq hai kahna ai 'asad'

ghain jab gum ho gai tab 'ain ka izhaar hai