taskin ko hum na roen jo zauq-e-nazar mile

taskīñ ko ham na ro.eñ jo zauq-e-nazar mile

hūrān-e-ḳhuld meñ tirī sūrat magar mile

apnī galī meñ mujh ko na kar dafn ba.ad-e-qatl

mere pate se ḳhalq ko kyuuñ terā ghar mile

sāqī-garī kī sharm karo aaj varna ham

har shab piyā hī karte haiñ mai jis qadar mile

tujh se to kuchh kalām nahīñ lekin ai nadīm

merā salām kahiyo agar nāma-bar mile

tum ko bhī ham dikhā.eñ ki majnūñ ne kyā kiyā

fursat kashākash-e-ġham-e-pinhāñ se gar mile

lāzim nahīñ ki ḳhizr kī ham pairvī kareñ

jaanā ki ik buzurg hameñ ham-safar mile

ai sākinān-e-kucha-e-dildār dekhnā

tum ko kahīñ jo 'ġhālib'-e-āshufta-sar mile

taskin ko hum na roen jo zauq-e-nazar mile

huran-e-KHuld mein teri surat magar mile

apni gali mein mujh ko na kar dafn baad-e-qatl

mere pate se KHalq ko kyun tera ghar mile

saqi-gari ki sharm karo aaj warna hum

har shab piya hi karte hain mai jis qadar mile

tujh se to kuchh kalam nahin lekin ai nadim

mera salam kahiyo agar nama-bar mile

tum ko bhi hum dikhaen ki majnun ne kya kiya

fursat kashakash-e-gham-e-pinhan se gar mile

lazim nahin ki KHizr ki hum pairwi karen

jaana ki ek buzurg hamein ham-safar mile

ai sakinan-e-kucha-e-dildar dekhna

tum ko kahin jo 'ghaalib'-e-ashufta-sar mile