tera kya kaam ab dil mein gham-e-jaanana aata hai

tirā kyā kaam ab dil meñ ġham-e-jānāna aatā hai

nikal ai sabr is ghar se ki sāhab-e-ḳhāna aatā hai

nazar meñ terī āñkheñ sar meñ saudā terī zulfoñ kā

ka.ī pariyoñ ke saa.e meñ tirā dīvāna aatā hai

vufūr-e-rahmat-e-bārī hai mai-ḳhvāroñ pe un rozoñ

jidhar se abr uThtā hai sū-e-mai-ḳhāna aatā hai

lagī dil kī bujhā.e bekasī meñ kaun hai aisā

magar ik girya-e-hasrat ki be-tābāna aatā hai

unhīñ se ġhamze kartī hai jo tujh par jaan dete haiñ

ajal tujh ko bhī kitnā nāz-e-mā'shūqāna aatā hai

pareshānī meñ ye 'ālam tirī zulfoñ kā dekhā hai

ki ik ik baal par qurbān hone shāna aatā hai

chhalak jaatā hai jām-e-'umr apnā vā.e-nākāmī

hamāre muñh talak saaqī agar paimāna aatā hai

vo but hī mehrbāñ sab apnā apnā haal kahte haiñ

lab-e-ḳhāmosh tujh ko bhī koī afsāna aatā hai

tilism-e-tāza terā sāya-e-dīvār rakhtā hai

badaltā hai parī kā bhes jo dīvāna aatā hai

ye 'azmat rah ke zāhid in butoñ meñ ham ne paa.ī hai

ki kā'ba ham ko lene tā-dar-e-mai-kHāna aatā hai

do-rañgī se nahīñ ḳhālī 'adam bhī sūrat-e-hastī

koī hushyār aatā hai koī dīvāna aatā hai

humā yuuñ ustuḳhvān-e-sokHta par mere girtā hai

taḌap kar shama' par jaise koī parvāna aatā hai

udhar haiñ husn kī ghāteñ idhar haiñ 'ishq kī bāteñ

tujhe afsūñ to mujh ko ai parī afsāna aatā hai

kalejā haath se ahl-e-ke ke chaak hotā hai

sadaf aasā agar mujh ko muyassar daana aatā hai

namak jallād chhiḌkā chāhtā hai mere zaḳhmoñ par

maze kā vaqt ab ai himmat-e-mardāna aatā hai

zabardastī kā dhaḌkā vasl meñ tum ko samāyā hai

kidhar ho hosh meñ aao koī huuñ na aatā hai

ilāhī kis kī sham'-e-husn se raushan hai ghar merā

ki ban jaatā hai jugnū aaj jo parvāna aatā hai

vo 'āshiq ḳhāl-o-ḳhat kā huuñ nazar-e-mor kartā huuñ

muyassar tīsre din bhī jo mujh ko daana aatā hai

'amīr' aur aane vaalā kaun hai gor-e-ġharībāñ par

jo raushan shama' hotī hai to haañ parvāna aatā hai

tera kya kaam ab dil mein gham-e-jaanana aata hai

nikal ai sabr is ghar se ki sahab-e-KHana aata hai

nazar mein teri aankhen sar mein sauda teri zulfon ka

kai pariyon ke sae mein tera diwana aata hai

wufur-e-rahmat-e-bari hai mai-KHwaron pe un rozon

jidhar se abr uThta hai su-e-mai-KHana aata hai

lagi dil ki bujhae bekasi mein kaun hai aisa

magar ek girya-e-hasrat ki be-tabana aata hai

unhin se ghamze karti hai jo tujh par jaan dete hain

ajal tujh ko bhi kitna naz-e-ma'shuqana aata hai

pareshani mein ye 'alam teri zulfon ka dekha hai

ki ek ek baal par qurban hone shana aata hai

chhalak jata hai jam-e-'umr apna wae-nakaami

hamare munh talak saqi agar paimana aata hai

wo but hi mehrban sab apna apna haal kahte hain

lab-e-KHamosh tujh ko bhi koi afsana aata hai

tilism-e-taza tera saya-e-diwar rakhta hai

badalta hai pari ka bhes jo diwana aata hai

ye 'azmat rah ke zahid in buton mein hum ne pai hai

ki ka'ba hum ko lene ta-dar-e-mai-kHana aata hai

do-rangi se nahin KHali 'adam bhi surat-e-hasti

koi hushyar aata hai koi diwana aata hai

huma yun ustuKHwan-e-sokHta par mere girta hai

taDap kar shama' par jaise koi parwana aata hai

udhar hain husn ki ghaten idhar hain 'ishq ki baaten

tujhe afsun to mujh ko ai pari afsana aata hai

kaleja hath se ahl-e-ke ke chaak hota hai

sadaf aasa agar mujh ko muyassar dana aata hai

namak jallad chhiDka chahta hai mere zaKHmon par

maze ka waqt ab ai himmat-e-mardana aata hai

zabardasti ka dhaDka wasl mein tum ko samaya hai

kidhar ho hosh mein aao koi hun na aata hai

ilahi kis ki sham'-e-husn se raushan hai ghar mera

ki ban jata hai jugnu aaj jo parwana aata hai

wo 'ashiq KHal-o-KHat ka hun nazar-e-mor karta hun

muyassar tisre din bhi jo mujh ko dana aata hai

'amir' aur aane wala kaun hai gor-e-ghariban par

jo raushan shama' hoti hai to han parwana aata hai