tere darwaze pe chilman nahin dekhi jati

tere darvāze pe chilman nahīñ dekhī jaatī

jān-e-jāñ ham se ye uljhan nahīñ dekhī jaatī

ruḳh pe ye zulf kī uljhan nahīñ dekhī jaatī

phuul kī god meñ nāgin nahīñ dekhī jaatī

be-hijābāna milo ham se ye parda kaisā

band Dolī meñ suhāgan nahīñ dekhī jaatī

jaam meñ ho to nazar aa.e gulābī joḌā

ham se botal meñ ye dulhan nahīñ dekhī jaatī

ghar banā.eñ kisī sahrā meñ mohabbat ke liye

shahr vāloñ se ye jogan nahīñ dekhī jaatī

ham nazar-bāz haiñ dikhlā hameñ devī kā jamāl

mūrtī ham se barahman nahīñ dekhī jaatī

ai 'fanā' kah de havā se ye uḌā le jaa.e

ham se ye ḳhāk-e-nasheman nahīñ dekhī jaatī

tere darwaze pe chilman nahin dekhi jati

jaan-e-jaan hum se ye uljhan nahin dekhi jati

ruKH pe ye zulf ki uljhan nahin dekhi jati

phul ki god mein nagin nahin dekhi jati

be-hijabana milo hum se ye parda kaisa

band Doli mein suhagan nahin dekhi jati

jam mein ho to nazar aae gulabi joDa

hum se botal mein ye dulhan nahin dekhi jati

ghar banaen kisi sahra mein mohabbat ke liye

shahr walon se ye jogan nahin dekhi jati

hum nazar-baz hain dikhla hamein dewi ka jamal

murti hum se barahman nahin dekhi jati

ai 'fana' kah de hawa se ye uDa le jae

hum se ye KHak-e-nasheman nahin dekhi jati