teri nisbat mera sahaara hai

terī nisbat merā sahārā hai

yahī kashtī yahī kinārā hai

sar to sajde se maiñ uThā letā

kyā karūñ naqsh-e-pā tumhārā hai

vo dar-e-yār hai ḳhudā kī qasam

maiñ ne sajda jahāñ guzārā hai

ai sanam tujh ko pūjne ke liye

maiñ ne dil meñ tujhe utārā hai

vo tire āstāñ pe jā pahuñchā

tū ne jis ko sanam pukārā hai

dil hai mushtāq aa bhī jaao sanam

merī tanhā.ī ne tumheñ pukārā hai

terā dar chhoḌ ke kidhar jā.ūñ

tere dar se mirā guzārā hai

justujū kis maqām par laa.ī

mujh meñ ab yaar kā nazārā hai

tū 'fanā' ho ke zindagī pā le

nigah-e-yār kā ishāra hai

teri nisbat mera sahaara hai

yahi kashti yahi kinara hai

sar to sajde se main uTha leta

kya karun naqsh-e-pa tumhaara hai

wo dar-e-yar hai KHuda ki qasam

main ne sajda jahan guzara hai

ai sanam tujh ko pujne ke liye

main ne dil mein tujhe utara hai

wo tere aastan pe ja pahuncha

tu ne jis ko sanam pukara hai

dil hai mushtaq aa bhi jao sanam

meri tanhai ne tumhein pukara hai

tera dar chhoD ke kidhar jaun

tere dar se mera guzara hai

justuju kis maqam par lai

mujh mein ab yar ka nazara hai

tu 'fana' ho ke zindagi pa le

nigah-e-yar ka ishaara hai