bas yahi soch ke pahron na raha hosh mujhe

bas yahī soch ke pahroñ na rahā hosh mujhe

kar diyā ho na kahīñ tū ne farāmosh mujhe

terī āñkhoñ kā ye mai-ḳhāna salāmat saaqī

mast rakhtā hai tirā bāda-e-sar-josh mujhe

hichkiyāñ maut kī aane lagīñ ab to aa jā

aur kuchh der meñ shāyad na rahe hosh mujhe

kab kā rusvā mere a’amāl mujhe kar dete

merī qismat ki milā tujh-sā ḳhatā-posh mujhe

kis kī aahaT se ye soyā huā dil jaag uThā

kar diyā kis kī sadā ne hama-tan gosh mujhe

yaad karatā rahā tasbīh ke dānoñ pe jise

kar diyā hai usī zālim ne farāmosh mujhe

ek do jaam se nīyat mirī bhar jaatī thī

tirī āñkhoñ ne banāyā hai balā-nosh mujhe

jīte-jī mujh ko samajhte the jo ik bār-e-garāñ

qabr tak le ke ga.e vo bhī sar-e-dosh mujhe

mujh pe khulne nahīñ detā vo haqīqat merī

hajla-e-zāt meñ rakhtā hai vo rū-posh mujhe

sohbat-e-mai-kada yaad aa.egī sab ko barsoñ

naam le-le ke mirā ro.eñge mai-nosh mujhe

bū-e-gul māñgne aa.e mire hoñToñ se mahak

chūmne ko tire mil jaa.eñ jo pā-posh mujhe

zindagī ke ġham-o-ālām kā maarā thā maiñ

maañ kī āġhosh lagī qabr kī āġhosh mujhe

de bhī saktā huuñ 'nasīr' iiñT kā patthar se javāb

vo to rakhā hai mire zarf ne ḳhāmosh mujhe

bas yahi soch ke pahron na raha hosh mujhe

kar diya ho na kahin tu ne faramosh mujhe

teri aankhon ka ye mai-KHana salamat saqi

mast rakhta hai tera baada-e-sar-josh mujhe

hichkiyan maut ki aane lagin ab to aa ja

aur kuchh der mein shayad na rahe hosh mujhe

kab ka ruswa mere a’amal mujhe kar dete

meri qismat ki mila tujh-sa KHata-posh mujhe

kis ki aahaT se ye soya hua dil jag uTha

kar diya kis ki sada ne hama-tan gosh mujhe

yaad karata raha tasbih ke danon pe jise

kar diya hai usi zalim ne faramosh mujhe

ek do jam se niyat meri bhar jati thi

teri aankhon ne banaya hai bala-nosh mujhe

jite-ji mujh ko samajhte the jo ek bar-e-garan

qabr tak le ke gae wo bhi sar-e-dosh mujhe

mujh pe khulne nahin deta wo haqiqat meri

hajla-e-zat mein rakhta hai wo ru-posh mujhe

sohbat-e-mai-kada yaad aaegi sab ko barson

nam le-le ke mera roenge mai-nosh mujhe

bu-e-gul mangne aae mere honTon se mahak

chumne ko tere mil jaen jo pa-posh mujhe

zindagi ke gham-o-alam ka mara tha main

man ki aaghosh lagi qabr ki aaghosh mujhe

de bhi sakta hun 'nasir' inT ka patthar se jawab

wo to rakha hai mere zarf ne KHamosh mujhe