ye kahan lagi ye kahan lagi ki qafas se aaj dhuan uTha

jale āshiyāne jo dil kī tarah chaman se shor-e-fuġhāñ uThā

ye kahāñ lagī ye kahāñ lagī ki qafas se aaj dhuāñ uThā

koī mast-e-mai-kada aa gayā mai-e-be-ḳhudī pilā gayā

na sadā-e-naġhma-e-dair uThe na haram se shor-e-azāñ uThā

laggī aag mere jigar meñ yuuñ na lage kisī ke bhī ghar meñ yuuñ

na to lau uThī na sharar uThe na chamak uThī na dhuāñ uThā

tujhe mai-farosh ḳhabar bhī hai ye maqām kyā hai ye kyā hai shai

ye rah-e-haram meñ dukān-e-mai tū yahāñ se apnī dukāñ uThā

ga.e saath sheḳh-e-haram ke ham na milā koī na liye qadam

na to ḳham baḌhā na subū jhukā jo uThā to pīr-e-muġhāñ uThā

lab-e-ḳhum se nikle sadā-e-qum sar-e-dosh aise hazār ḳhum

ḳham-e-āsmāñ bhī ho jis meñ gum vo syaah abr kahāñ uThā

ye saped-rīsh 'riyāz' hai jo banā hai bazm meñ va.az-go

use kyuuñ na abr-e-siyāh kahūñ ki baras paḌā ye jahāñ uThā

jale aashiyane jo dil ki tarah chaman se shor-e-fughan uTha

ye kahan lagi ye kahan lagi ki qafas se aaj dhuan uTha

koi mast-e-mai-kada aa gaya mai-e-be-KHudi pila gaya

na sada-e-naghma-e-dair uThe na haram se shor-e-azan uTha

laggi aag mere jigar mein yun na lage kisi ke bhi ghar mein yun

na to lau uThi na sharar uThe na chamak uThi na dhuan uTha

tujhe mai-farosh KHabar bhi hai ye maqam kya hai ye kya hai shai

ye rah-e-haram mein dukan-e-mai tu yahan se apni dukan uTha

gae sath sheKH-e-haram ke hum na mila koi na liye qadam

na to KHam baDha na subu jhuka jo uTha to pir-e-mughan uTha

lab-e-KHum se nikle sada-e-qum sar-e-dosh aise hazar KHum

KHam-e-asman bhi ho jis mein gum wo syah abr kahan uTha

ye saped-rish 'riyaz' hai jo bana hai bazm mein waz-go

use kyun na abr-e-siyah kahun ki baras paDa ye jahan uTha