hazaron KHwahishen aisi ki har KHwahish pe dam nikle

hazāroñ ḳhvāhisheñ aisī ki har ḳhvāhish pe dam nikle

bahut nikle mire armān lekin phir bhī kam nikle

Dare kyuuñ merā qātil kyā rahegā us kī gardan par

vo ḳhuuñ jo chashm-e-tar se 'umr yuuñ dam-ba-dam nikle

nikalnā ḳhuld se aadam kā sunte aa.e haiñ lekin

bahut be-ābrū ho kar tire kūche se ham nikle

bharam khul jaa.e zālim tere qāmat kī darāzī kā

agar is turra-e-pur-pech-o-ḳham kā pech-o-ḳham nikle

magar likhvā.e koī us ko ḳhat to ham se likhvā.e

huī sub.h aur ghar se kaan par rakh kar qalam nikle

huī is daur meñ mansūb mujh se bāda-ashāmī

phir aayā vo zamāna jo jahāñ meñ jām-e-jam nikle

huī jin se tavaqqo' ḳhastagī kī daad paane kī

vo ham se bhī ziyāda ḳhasta-e-teġh-e-sitam nikle

mohabbat meñ nahīñ hai farq jiine aur marne kā

usī ko dekh kar jiite haiñ jis kāfir pe dam nikle

kahāñ mai-ḳhāna kā darvāza 'ġhālib' aur kahāñ vā'iz

par itnā jānte haiñ kal vo jaatā thā ki ham nikle

hazaron KHwahishen aisi ki har KHwahish pe dam nikle

bahut nikle mere arman lekin phir bhi kam nikle

Dare kyun mera qatil kya rahega us ki gardan par

wo KHun jo chashm-e-tar se 'umr yun dam-ba-dam nikle

nikalna KHuld se aadam ka sunte aae hain lekin

bahut be-abru ho kar tere kuche se hum nikle

bharam khul jae zalim tere qamat ki daraazi ka

agar is turra-e-pur-pech-o-KHam ka pech-o-KHam nikle

magar likhwae koi us ko KHat to hum se likhwae

hui subh aur ghar se kan par rakh kar qalam nikle

hui is daur mein mansub mujh se baada-ashami

phir aaya wo zamana jo jahan mein jam-e-jam nikle

hui jin se tawaqqo' KHastagi ki dad pane ki

wo hum se bhi ziyaada KHasta-e-tegh-e-sitam nikle

mohabbat mein nahin hai farq jine aur marne ka

usi ko dekh kar jite hain jis kafir pe dam nikle

kahan mai-KHana ka darwaza 'ghaalib' aur kahan wa'iz

par itna jaante hain kal wo jata tha ki hum nikle