mujhe be-KHudi ye tu ne bhali chashni chakhai

mujhe be-ḳhudī ye tū ne bhalī chāshnī chakhā.ī

kisī aarzū kī dil meñ nahīñ ab rahī samā.ī

na hazar hai na ḳhatar hai na rajā hai ne duā hai

na ḳhayāl-e-bandagī hai na tamannā-e-kHudā.ī

na maqām-e-guftugū hai na mahall-e-justujū hai

na vahāñ havās pahuñcheñ na ḳhirad ko hai rasā.ī

na makīñ hai ne makāñ hai na zamīñ hai ne zamāñ hai

dil-e-be-navā ne mere jahāñ chhāvnī hai chhā.ī

na visāl hai na hijrāñ na surūr hai na ġham hai

jise kahiye ḳhvāb-e-ġhaflat so vo niiñd ham ko aa.ī

man-o-tū uThe jahāñ hoñ havaseñ vahāñ kahāñ hoñ

jo duī ke thī lavāzim so rihā.ī un se paa.ī

yahāñ maiñ rahā huuñ jab to suḳhan-e-'niyāz' bolūñ

sunoge zbān-e-ne se vahī jo kahegā naa.ī

mujhe be-KHudi ye tu ne bhali chashni chakhai

kisi aarzu ki dil mein nahin ab rahi samai

na hazar hai na KHatar hai na raja hai ne dua hai

na KHayal-e-bandagi hai na tamanna-e-kHudai

na maqam-e-guftugu hai na mahall-e-justuju hai

na wahan hawas pahunchen na KHirad ko hai rasai

na makin hai ne makan hai na zamin hai ne zaman hai

dil-e-be-nawa ne mere jahan chhawni hai chhai

na visal hai na hijran na surur hai na gham hai

jise kahiye KHwab-e-ghaflat so wo nind hum ko aai

man-o-tu uThe jahan hon hawasen wahan kahan hon

jo dui ke thi lawazim so rihai un se pai

yahan main raha hun jab to suKHan-e-'niyaz' bolun

sunoge zban-e-ne se wahi jo kahega nai