ye na thi hamari qismat ki visal-e-yar hota

ye na thī hamārī qismat ki visāl-e-yār hotā

agar aur jiite rahte yahī intizār hotā

tire vā'de par jiye ham to ye jaan jhuuT jaanā

ki ḳhushī se mar na jaate agar e'tibār hotā

tirī nāzukī se jaanā ki bañdhā thā 'ahd bodā

kabhī tū na toḌ sakta agar ustuvār hotā

koī mere dil se pūchhe tire tīr-e-nīm-kash ko

ye ḳhalish kahāñ se hotī jo jigar ke paar hotā

ye kahāñ kī dostī hai ki bane haiñ dost nāseh

koī chāra-sāz hotā koī ġham-gusār hotā

rag-e-sañg se Tapaktā vo lahū ki phir na thamtā

jise ġham samajh rahe ho ye agar sharār hotā

ġham agarche jāñ-gusil hai pa kahāñ bacheñ ki dil hai

ġham-e-'ishq gar na hotā ġham-e-rozgār hotā

kahūñ kis se maiñ ki kyā hai shab-e-ġham burī balā hai

mujhe kyā burā thā marnā agar ek baar hotā

hue mar ke ham jo rusvā hue kyuuñ na ġharq-e-dariyā

na kabhī janāza uThtā na kahīñ mazār hotā

use kaun dekh saktā ki yagāna hai vo yaktā

jo duī kī bū bhī hotī to kahīñ do-chār hotā

ye masā.il-e-tasavvuf ye tirā bayān 'ġhālib'

tujhe ham valī samajhte jo na bāda-ḳhvār hotā

ye na thi hamari qismat ki visal-e-yar hota

agar aur jite rahte yahi intizar hota

tere wa'de par jiye hum to ye jaan jhuT jaana

ki KHushi se mar na jate agar e'tibar hota

teri nazuki se jaana ki bandha tha 'ahd boda

kabhi tu na toD sakta agar ustuwar hota

koi mere dil se puchhe tere tir-e-nim-kash ko

ye KHalish kahan se hoti jo jigar ke par hota

ye kahan ki dosti hai ki bane hain dost naseh

koi chaara-saz hota koi gham-gusar hota

rag-e-sang se Tapakta wo lahu ki phir na thamta

jise gham samajh rahe ho ye agar sharar hota

gham agarche jaan-gusil hai pa kahan bachen ki dil hai

gham-e-'ishq gar na hota gham-e-rozgar hota

kahun kis se main ki kya hai shab-e-gham buri bala hai

mujhe kya bura tha marna agar ek bar hota

hue mar ke hum jo ruswa hue kyun na gharq-e-dariya

na kabhi janaza uThta na kahin mazar hota

use kaun dekh sakta ki yagana hai wo yakta

jo dui ki bu bhi hoti to kahin do-chaar hota

ye masail-e-tasawwuf ye tera bayan 'ghaalib'

tujhe hum wali samajhte jo na baada-KHwar hota