tum jis dard ke darman ho us dard ki qismat kya kahna

tum jis dard ke darmāñ ho us dard kī qismat kyā kahnā

tum taqdīr-e-mohabbat ho taqdīr-e-mohabbat kyā kahnā

'ishq kī sūrat meñ muzmar hai husn-e-haqīqat kyā kahnā

maiñ goyā terī mahfil huuñ tū merī ḳhalvat kyā kahnā

dīvāna-e-husn kabhī thā maiñ ab husn hai merā dīvāna

ai jazb-e-'ishq ta'ālallāh tāsīr-e-mohabbat kyā kahnā

aa mujh se mujh ko le bhī le bā-ḳhud huuñ tū be-ḳhud kar de

maiñ terī mastī ke sadqe mastī kī hasrat kyā kahnā

un mīThī-mīThī nazroñ se jaañ pyārī-pyārī bātoñ se

be-dard ne dard bhī chhīn liyā ab dil kī hālat kyā kahnā

vo terā 'zahīn' vo dīvāna vo riñd ḳharāb-e-mai-ḳhāna

har raaz hai us kā afsāna ab us kī hālat kyā kahnā

tum jis dard ke darman ho us dard ki qismat kya kahna

tum taqdir-e-mohabbat ho taqdir-e-mohabbat kya kahna

'ishq ki surat mein muzmar hai husn-e-haqiqat kya kahna

main goya teri mahfil hun tu meri KHalwat kya kahna

diwana-e-husn kabhi tha main ab husn hai mera diwana

ai jazb-e-'ishq ta'alallah tasir-e-mohabbat kya kahna

aa mujh se mujh ko le bhi le ba-KHud hun tu be-KHud kar de

main teri masti ke sadqe masti ki hasrat kya kahna

un miThi-miThi nazron se jaan pyari-pyari baaton se

be-dard ne dard bhi chhin liya ab dil ki haalat kya kahna

wo tera 'zahin' wo diwana wo rind KHarab-e-mai-KHana

har raaz hai us ka afsana ab us ki haalat kya kahna