tumhaari anjuman se uTh ke diwane kahan jate

tumhārī anjuman se uTh ke dīvāne kahāñ jaate

jo vābasta hue tum se vo afsāne kahāñ jaate

nikal kar dair-o-kā'ba se agar miltā na mai-ḳhāna

to Thukrā.e hue insāñ ḳhudā jaane kahāñ jaate

tumhārī be-ruḳhī ne laaj rakh lī bāda-ḳhāne kī

tum āñkhoñ se pilā dete to paimāne kahāñ jaate

chalo achchhā huā kaam aa ga.ī dīvāngī apnī

vagarna ham zamāne bhar ko samjhāne kahāñ jaate

'qatīl' apnā muqaddar ġham se begāna agar hotā

to phir apne parā.e ham se pahchāne kahāñ jaate

tumhaari anjuman se uTh ke diwane kahan jate

jo wabasta hue tum se wo afsane kahan jate

nikal kar dair-o-ka'ba se agar milta na mai-KHana

to Thukrae hue insan KHuda jaane kahan jate

tumhaari be-ruKHi ne laj rakh li baada-KHane ki

tum aankhon se pila dete to paimane kahan jate

chalo achchha hua kaam aa gai diwangi apni

wagarna hum zamane bhar ko samjhane kahan jate

'qatil' apna muqaddar gham se begana agar hota

to phir apne parae hum se pahchane kahan jate