unki taraf se tark-e-mulaqat ho gai

un kī taraf se tark-e-mulāqāt ho ga.ī

ham jis se Dar rahe the vahī baat ho ga.ī

ā.īna dekhne meñ na.ī baat ho ga.ī

un se hī aaj un kī mulāqāt ho ga.ī

tai un se roz-e-hashr mulāqāt ho ga.ī

itnī sī baat kitnī baḌī baat ho ga.ī

kam-zarfī-e-hayāt se tañg aa gayā thā maiñ

achchhā huā qazā se mulāqāt ho ga.ī

din meñ bhaTak rahe haiñ jo manzil kī raah se

ye log kyā kareñge agar raat ho ga.ī

aa.e haiñ vo marīz-e-mohabbat ko dekh kar

aañsū batā rahe haiñ koī baat ho ga.ī

thā aur kaun pūchhne vaalā marīz kā

tum aa ga.e to pursish-e-hālāt ho ga.ī

ai bulbul-e-bahār-e-chaman apnī ḳhair maañg

sayyād-o-bāġhbāñ meñ mulāqāt ho ga.ī

jab zulf yaad aa ga.ī yuuñ ashk bah ga.e

jaise añdherī raat meñ barsāt ho ga.ī

gulshan kā hosh ahl-e-junūñ ko bhalā kahāñ

sahrā meñ paḌ rahe to basar raat ho ga.ī

dar-parda bazm-e-ġhair meñ donoñ kī guftugū

uTThī udhar nigāh idhar baat ho ga.ī

kab tak 'qamar' ho shaam ke va.ade kā intizār

sūraj chhupā charāġh jale raat ho ga.ī

un ki taraf se tark-e-mulaqat ho gai

hum jis se Dar rahe the wahi baat ho gai

aaina dekhne mein nai baat ho gai

un se hi aaj un ki mulaqat ho gai

tai un se roz-e-hashr mulaqat ho gai

itni si baat kitni baDi baat ho gai

kam-zarfi-e-hayat se tang aa gaya tha main

achchha hua qaza se mulaqat ho gai

din mein bhaTak rahe hain jo manzil ki rah se

ye log kya karenge agar raat ho gai

aae hain wo mariz-e-mohabbat ko dekh kar

aansu bata rahe hain koi baat ho gai

tha aur kaun puchhne wala mariz ka

tum aa gae to pursish-e-haalat ho gai

ai bulbul-e-bahaar-e-chaman apni KHair mang

sayyaad-o-baghban mein mulaqat ho gai

jab zulf yaad aa gai yun ashk bah gae

jaise andheri raat mein barsat ho gai

gulshan ka hosh ahl-e-junun ko bhala kahan

sahra mein paD rahe to basar raat ho gai

dar-parda bazm-e-ghair mein donon ki guftugu

uTThi udhar nigah idhar baat ho gai

kab tak 'qamar' ho sham ke wade ka intizar

suraj chhupa charagh jale raat ho gai