nigah-e-yar mad-masti mein bhi hushiyar kaisi hai

nigāh-e-yār mad-mastī meñ bhī hushiyār kaisī hai

mirā dil chhīn lene ke liye tayyār kaisī hai

adā se pher kar ḳhanjar gale par yuuñ lage kahne

shahīd-e-nāz batlāo ki us meñ dhaar kaisī hai

jigar meñ chhā ga.ī pahlū meñ kis ke dil meñ jā taḌpī

ġhazab kī chulbulī chanchal nigāh-e-yār kaisī hai

abhī niklā hai dam Thahro kisī se mil to lene do

abhī se le ke chalne kī ye mārā-mār kaisī hai

vo ham ko zab.h karte haiñ ham hī se pūchhte haiñ yuuñ

zarā sāheb batā denā mirī talvār kaisī hai

qazā bhī sadqe hotī hai nigāh-e-tīr qātil ke

‘shahādat’ sar kaTāne ke liye tayyār kaisī hai

nigah-e-yar mad-masti mein bhi hushiyar kaisi hai

mera dil chhin lene ke liye tayyar kaisi hai

ada se pher kar KHanjar gale par yun lage kahne

shahid-e-naz batlao ki us mein dhaar kaisi hai

jigar mein chha gai pahlu mein kis ke dil mein ja taDpi

ghazab ki chulbuli chanchal nigah-e-yar kaisi hai

abhi nikla hai dam Thahro kisi se mil to lene do

abhi se le ke chalne ki ye mara-mar kaisi hai

wo hum ko zabh karte hain hum hi se puchhte hain yun

zara saheb bata dena meri talwar kaisi hai

qaza bhi sadqe hoti hai nigah-e-tir qatil ke

‘shahadat’ sar kaTane ke liye tayyar kaisi hai