we suraten ilahi ka mulk bastiyan hain

ve sūrateñ ilāhī kā mulk bastiyāñ haiñ

ab dekhne ko jin ke āñkheñ tarastiyāñ haiñ

aayā thā kyuuñ 'adam meñ kyā kar chalā jahāñ meñ

ye marg-o-zīst tujh bin aapas meñ hañstiyāñ haiñ

kyūñ-kar na ho mushabbak shīsha sā dil hamārā

us shoḳh kī nigāheñ patthar meñ dhañstiyāñ haiñ

barsāt kā to mausam kab kā nikal gayā par

mizhgāñ kī ye ghaTā.eñ ab tak barsatiyāñ haiñ

lete haiñ chhīn kar dil 'āshiq kā pal meñ dekho

ḳhūbāñ kī 'āshiqoñ par kyā pesh-dastiyāñ haiñ

is vāste ki haiñ ye vahshī nikal na jāveñ

āñkhoñ ko merī mizhgāñ Doroñ se kastiyāñ haiñ

qīmat meñ un ke go ham do jag ko de chuke ab

us yaar kī nigāheñ tis par jo sastiyāñ haiñ

un ne kahā ye mujh se ab chhoḌ duḳht-e-raz ko

piirī meñ ai divāne ye kaun mastiyāñ haiñ

jab maiñ kahā ye us se 'saudā' se apne mil ke

is saal tū hai saaqī aur mai-parastiyāñ haiñ

we suraten ilahi ka mulk bastiyan hain

ab dekhne ko jin ke aankhen tarastiyan hain

aaya tha kyun 'adam mein kya kar chala jahan mein

ye marg-o-zist tujh bin aapas mein hanstiyan hain

kyun-kar na ho mushabbak shisha sa dil hamara

us shoKH ki nigahen patthar mein dhanstiyan hain

barsat ka to mausam kab ka nikal gaya par

mizhgan ki ye ghaTaen ab tak barsatiyan hain

lete hain chhin kar dil 'ashiq ka pal mein dekho

KHuban ki 'ashiqon par kya pesh-dastiyan hain

is waste ki hain ye wahshi nikal na jawen

aankhon ko meri mizhgan Doron se kastiyan hain

qimat mein un ke go hum do jag ko de chuke ab

us yar ki nigahen tis par jo sastiyan hain

un ne kaha ye mujh se ab chhoD duKHt-e-raz ko

piri mein ai diwane ye kaun mastiyan hain

jab main kaha ye us se 'sauda' se apne mil ke

is sal tu hai saqi aur mai-parastiyan hain