yar tha gulzar tha mai thi faza thi main na tha

yaar thā gulzār thā mai thī fazā thī maiñ na thā

lā.eq-e-pā-bos-e-jānāñ kyā hinā thī maiñ na thā

haath kyuuñ bāñdhe mire chhallā agar chorī gayā

ye sarāpā shoḳhī-e-duzd-e-hinā thī maiñ na thā

be-ḳhudī meñ le liyā bosa ḳhatā kiije muaaf

ye dil-e-betāb kī saarī ḳhatā thī maiñ na thā

haa.e saaqī ye ho sāmāñ aur āshiq vaañ na ho

yaar thā sabza thā badlī thī havā thī maiñ na thā

maiñ sisaktā rah gayā aur mar ga.e farhād-o-qais

kyā unhīñ donoñ ke hisse meñ qazā thī maiñ na thā

maiñ ne pūchhā kyā huā vo aap kā husn-o-shabāb

hañs ke bolā vo sanam shān-e-ḳhudā thī maiñ na thā

ai 'zafar' ye dil pa mere daaġh kaisā rah gayā

ḳhāna bāġh-e-yār meñ ḳhalq-e-ḳhudā thī maiñ na thā

yar tha gulzar tha mai thi faza thi main na tha

laeq-e-pa-bos-e-jaanan kya hina thi main na tha

hath kyun bandhe mere chhalla agar chori gaya

ye sarapa shoKHi-e-duzd-e-hina thi main na tha

be-KHudi mein le liya bosa KHata kije muaf

ye dil-e-betab ki sari KHata thi main na tha

hae saqi ye ho saman aur aashiq wan na ho

yar tha sabza tha badli thi hawa thi main na tha

main sisakta rah gaya aur mar gae farhad-o-qais

kya unhin donon ke hisse mein qaza thi main na tha

main ne puchha kya hua wo aap ka husn-o-shabab

hans ke bola wo sanam shan-e-KHuda thi main na tha

ai 'zafar' ye dil pa mere dagh kaisa rah gaya

KHana bagh-e-yar mein KHalq-e-KHuda thi main na tha