ye aarzu thi tujhe gul ke ru-ba-ru karte

ye aarzū thī tujhe gul ke rū-ba-rū karte

ham aur bulbul-e-betāb guftugū karte

payāmbar na mayassar huā to ḳhuub huā

zabān-e-ġhair se kyā sharh-e-ārzū karte

mirī tarah se mah-o-mehr bhī haiñ āvāra

kisī habīb kī ye bhī haiñ justujū karte

hamesha rañg-e-zamāna badaltā rahtā hai

safed rañg haiñ āḳhir siyāh mū karte

luTāte daulat-e-duniyā ko mai-kade meñ ham

tilā.ī sāġhar-e-mai nuqra.ī subū karte

hamesha maiñ ne garebāñ ko chaak chaak kiyā

tamām umr rafūgar rahe rafū karte

jo dekhte tirī zanjīr-e-zulf kā aalam

asiir hone kī āzād aarzū karte

bayāz-e-gardan-e-jānāñ ko sub.h kahte jo ham

sitāra-e-saharī takma-e-gulū karte

ye ka.abe se nahīñ be-vaj.h nisbat-e-ruḳh-e-yār

ye be-sabab nahīñ murde ko qibla-rū karte

sikhāte nāla-e-shab-gīr ko dar-andāzī

ġham-e-firāq kā us charḳh ko adū karte

vo jān-e-jāñ nahīñ aatā to maut hī aatī

dil-o-jigar ko kahāñ tak bhalā lahū karte

na pūchh ālam-e-bargashta-tāla.ī 'ātish'

barastī aag jo bārāñ kī aarzū karte

ye aarzu thi tujhe gul ke ru-ba-ru karte

hum aur bulbul-e-betab guftugu karte

payambar na mayassar hua to KHub hua

zaban-e-ghair se kya sharh-e-arzu karte

meri tarah se mah-o-mehr bhi hain aawara

kisi habib ki ye bhi hain justuju karte

hamesha rang-e-zamana badalta rahta hai

safed rang hain aaKHir siyah mu karte

luTate daulat-e-duniya ko mai-kade mein hum

tilai saghar-e-mai nuqrai subu karte

hamesha main ne gareban ko chaak chaak kiya

tamam umr rafugar rahe rafu karte

jo dekhte teri zanjir-e-zulf ka aalam

asir hone ki aazad aarzu karte

bayaz-e-gardan-e-jaanan ko subh kahte jo hum

sitara-e-sahari takma-e-gulu karte

ye kabe se nahin be-wajh nisbat-e-ruKH-e-yar

ye be-sabab nahin murde ko qibla-ru karte

sikhate nala-e-shab-gir ko dar-andazi

gham-e-firaq ka us charKH ko adu karte

wo jaan-e-jaan nahin aata to maut hi aati

dil-o-jigar ko kahan tak bhala lahu karte

na puchh aalam-e-bargashta-talai 'atish'

barasti aag jo baran ki aarzu karte