zikr us pari-wash ka aur phir bayan apna

zikr us parī-vash kā aur phir bayāñ apnā

ban gayā raqīb āḳhir thā jo rāz-dāñ apnā

mai vo kyuuñ bahut piite bazm-e-ġhair meñ yā rabb

aaj hī huā manzūr un ko imtihāñ apnā

manzar ik bulandī par aur ham banā sakte

'arsh se udhar hotā kaash ke makāñ apnā

de vo jis qadar zillat ham hañsī meñ Tāleñge

baare āshnā niklā un kā pāsbāñ apnā

dard-e-dil likhūñ kab tak jā.ūñ un ko dikhlā duuñ

uñgliyāñ figār apnī ḳhāma ḳhūñ-chakāñ apnā

ghiste ghiste miT jaatā aap ne 'abas badlā

nañg-e-sajda se mere sañg-e-āstāñ apnā

tā kare na ġhammāzī kar liyā hai dushman ko

dost kī shikāyat meñ ham ne ham-zabāñ apnā

ham kahāñ ke daanā the kis hunar meñ yaktā the

be-sabab huā 'ġhālib' dushman āsmāñ apnā

zikr us pari-wash ka aur phir bayan apna

ban gaya raqib aaKHir tha jo raaz-dan apna

mai wo kyun bahut pite bazm-e-ghair mein ya rabb

aaj hi hua manzur un ko imtihan apna

manzar ek bulandi par aur hum bana sakte

'arsh se udhar hota kash ke makan apna

de wo jis qadar zillat hum hansi mein Talenge

bare aashna nikla un ka pasban apna

dard-e-dil likhun kab tak jaun un ko dikhla dun

ungliyan figar apni KHama KHun-chakan apna

ghiste ghiste miT jata aap ne 'abas badla

nang-e-sajda se mere sang-e-astan apna

ta kare na ghammazi kar liya hai dushman ko

dost ki shikayat mein hum ne ham-zaban apna

hum kahan ke dana the kis hunar mein yakta the

be-sabab hua 'ghaalib' dushman aasman apna