شریعت کی تمہیں سے زندگی ہے غوث جیلانی

شریعت کی تمہیں سے زندگی ہے غوث جیلانی

حقیقت کی تمہیں کو آگہی ہے غوث جیلانی

نظر جس پر پڑی تیری مقدر جگمگا اٹھا

ہزاروں کی یوں ہی قسمت بنی ہے غوث جیلانی

قیامت تک تری شمعِ ولایت بجھ نہیں سکتی

تو حسنِ احمدی کی روشنی ہے غوث جیلانی

جہاں قدرت کے سارے راز کھل جاتے ہیں بندے پر

وہ منزل آپ کی ہے، آپ کی ہے غوث جیلانی

عبادت کیا عبادت تھی، ولایت کیا ولایت تھی

ابھی تک دل کی دنیا جھومتی ہے غوث جیلانی

فنائے ذات حق ہو کر کیا یہ آپ نے ثابت

محبت بے نیازِ بندگی ہے غوث جیلانی

ترے بحرِ کرامت کا کنارا ہی نہیں ملتا

زمانے کی نظر تھک تھک گئی ہے غوث جیلانی

مقامِ جاوداں کی آپ کس منزل پہ پہنچے ہیں

جہاں ہر اک نفس اک زندگی ہے غوث جیلانی

وہ تیرا ہے تو اس کا ہے، وہ تجھ میں ہے تو اس سے ہے

خدائی ہے کہ تیری بندگی ہے غوث جیلانی

تجھے کیا فکر ہے عارفؔ اسی کو فکر ہے تیری

سخی ہے غوث جیلانی، ولی ہے غوث جیلانی