اتر جاتی ہے دل میں نور کی تنویر حیدر شاہ

اتر جاتی ہے دل میں نور کی تنویر حیدر شاہ

تصور میں جب آتی ہے تری تصویر حیدر شاہ

طفیل غوث جس کے بھی ہوئے تم پیر حیدر شاہ

جہاں میں ہو گئی اس کی بڑی توقیر حیدر شاہ

ولایت کی تمہاری ہیں ضمانت غوث جیلانی

چلی ہے سلسلہ در سلسلہ تاثیر حیدر شاہ

ترا چہرہ یہ کہتا ہے کہ نورِ سیدی تو ہے

زمانہ دیکھتا ہی رہ گیا تنویر حیدر شاہ

ہوں بیکا نیر جلسے کہ ہوں لاہور میں جلسے

یہاں بھی پیر حیدر شاہ، وہاں بھی پیر حیدر شاہ

زمانہ کے کسی طوفاں سے جھٹکا کھا نہیں سکتی

محبت، پیار کی، اخلاص کی تعمیر حیدر شاہ

وہی صورت، وہی سیرت، وہی عادت، وہی خصلت

ہیں اکبر شاہ سچے جانشینِ پیر حیدر شاہ

اجالا کر دیا آ کر ہماری ساری بستی میں

نشانی چھوڑ کر ایسی گئے ہو پیر حیدر شاہ

دعائے خیر تھی اُن کی سبھی کے واسطے عارفؔ

کرم فرما تھے دنیا پر جناب پیر حیدر شاہ