خالقِ کائنات کا منشا و مدعا نبی

خالقِ کائنات کا منشا و مدعا نبی

خلق کی ابتدا نبی، خلق کی انتہا نبی

خاتم انبیا ہیں آپ خاتم مرسلاں ہیں آپ

کوئی ہوا نہ ہوگا اب آپ سا دوسرا نبی

آپ جو منہ سے کہتے ہیں حکم خدا سے کہتے ہیں

ہوتا ہے رب کا فیصلہ آپ کا فیصلا نبی

سر تا قدم تمام نور، نور فشاں جمالِ رخ

جلوہ نمائے حق نبی، آئینۂ خدا نبی

اچھے تمام اؤلیا، اچھے تمام انبیا

آپ کا کہنا کیا نبی، آپ کی بات کیا نبی

رحمتِ عالمیں کا تاج سرپہ سجائے یوں رکھا

ظلم و ستم کے بدلے بھی دیتے رہے دعا نبی

سیرتِ پاک آپ کی پورا نظامِ زندگی

سیکھ لے آپ سے کوئی جینے کی ہر ادا نبی

دونوں جہاں کی مشکلیں چشمِ کرم سے دور ہوں

دنیا میں آسرا نبی، عقبیٰ میں آسرا نبی

عارفؔ ادا کرے گا کیا، شکر خدا کے فضل کا

صدقے میں آپ کے اسے کیا کیا نہیں ملا نبی