اے نورِ خدا وے شاہِ ہدا سبحان اللہ سبحان اللہ

اے نورِ خدا وے شاہِ ہدا سبحان اللہ سبحان اللہ

اے بحرِ سخا وے کانِ عطا سبحان اللہ سبحان اللہ

کیا وصف بھلا ہو مجھ سے ادا اے سرور عالم شاہِ ہدا

واصف ہے خدا جب خود کو ترا سبحان اللہ سبحان اللہ

جو چاہا کیا وہ حق نے عطا ہر ایک نبی ہے تم پہ فدا

حق نے یہ تمہیں رتبہ بخشا سبحان اللہ سبحان اللہ

جو کرتا نہ پیدا ان کو خدا تو ہوتے نہ پیدا ارض وسما

لولاک لما فرمان ہوا سبحان اللہ سبحان اللہ

واللیل و مزمل اور طٰہ میں وصف ہیں تیرے نورِ خدا

یہ حق سے ملا رتبہ اعلیٰ سبحان اللہ سبحان اللہ

میں کس سے کہوں اے شاہِ ہدا جو رنج گذر تا ہے صبح و مسا

ہے دونوں جہاں میں کون مرا سبحان اللہ سبحان اللہ

اے شاہِ رسل سلطان عطا محبوبِ خدا اے ربِّ علیٰ

ہر چیز میں تم ہو جلوہ نما سبحان اللہ سبحان اللہ

معراج کی شب اے شاہِ ہدا فرمانِ الٰہی یہ پہنچا

مشتاق ہیں ہم تم آؤ ذرا سبحان اللہ سبحان اللہ

ہے حکمِ محمد حکمِ خدا وللہ نہیں شک ہی اصلا

قرآن کو پڑھ کر دیکھ لیا سبحان اللہ سبحان اللہ

مخلصؔ پہ کرم ہو بہرِ خدا اے سیدِ والا روزِ جزا

مملوک یہ ہے تم ہو مولیٰ سبحان اللہ سبحان اللہ