اے علاؤالدین صابر، وہ ترا دربار ہے

اے علاؤالدین صابر، وہ ترا دربار ہے

جو یہاں تک آگیا بس اس کا بیڑا پار ہے

بیکلی دل کی بڑھی جاتی ہے مولا ہجر میں

جانیں کیسا درد ہے یہ جانیں کیا آزار ہے

میکدہ کلیر کا ہم مستوں سے چھوٹے کس طرح

بے پئے بھی دل یہاں ہر ایک کا سرشار ہے

ہے بھنور میں اپنی کشتی اور دریا کا یہ رنگ

زور پر سیلاب ہے طوفان ہے، منجدھار ہے

دستگیری کیجیے، اے دستگیر بے کساں

ڈوبتا ہوں نا خدائی آپ کی درکار ہے

دردِ ہجراں کا ترے ہو جائے گا اے دل علاج

صبر کر تو صبر کر، صابر ترا غم خوار ہے