چٹکیاں لیتی ہے دل میں ہر گھڑی یادِ رسول

چٹکیاں لیتی ہے دل میں ہر گھڑی یادِ رسول

بن گئی ہے اب تو میری زندگی یادِ رسول

دفعتاً یہ دل مثالِ عنچہ و گل کھل اٹھا

جب وفورِ یاس و غم میں آگئی یادِ رسول

بزمِ شعر و نغمہ تھی یا تختہ دار و رسن

ہم کو ہر اک حال میں آتی رہی یادِ رسول

کل بھی یہ چھائی ہوئی تھی جان و دل پر سر بہ سر

اور رگ رگ میں بسی ہے آج بھی یادِ رسول

کیا کہوں میں اب کسی سے مدعائے زندگی

جب مری ہستی کا حاصل بن گئی یادِ رسول

اس سے پہلے بزم ہستی کیا تھی! اک ظلمت کدہ

دے گئی ہے شمع دل کو روشنی یادِ رسول

پوچھتے پھرتے ہیں ہم دنیا سے اب اپنا پتہ

زندگی پر اس طرح کچھ چھا گئی یادِ رسول

بارِ غم سے جب ہوا میں مائلِ فریاد عرشؔ

میرے دل کو دے گئی تسکین سی یادِ رسول