رونق شان بے نشاں، نام و نشاں میں بھی آ

رونق شان بے نشاں، نام و نشاں میں بھی آ

زیب فزائے لا مکاں، اب تو مکان میں بھی آ

جہل میں نور بن کے آ، شک میں سکون بن کے آ

بن کے یقین کی چمک، وہم و گمان میں بھی آ

آنکھوں میں نور بن کے آ، دل میں سرور بن کے آ

بن کے حیاتِ جاوداں، تو میری جان میں بھی آ

دل تو مرا ہے تیرا گھر، پھر تو ہے میری جاں کدھر

رہتا ہے کیوں ادھر ادھر، اپنے مکان میں بھی آ

ملکِ غنائے ذات میں جلوہ گری بہت رہی

پردۂ غیب سے نکل، بزم عیاں میں بھی آ

صبح امید بن کے آ، دیدۂ انتظار میں

نغمۂ جاں فزا سنا، لطف کی شان میں بھی آ

پرتوِ عز و جاہ ڈال، سر پہ تو میرے تاج بن

کر تو دلِ عد و فگار، تیر و کمان میں بھی آ

خوف سے تیرے پاش پاش حسرتِؔ بے نوا کا دل

بہرِ سکونِ جان و دل، امین و امان میں بھی آ