تو شمع نبوت ہے عالم تیرا پروانہ

تو شمع نبوت ہے عالم تیرا پروانہ

تو ماہ رسالت ہے اے جلوۂ جانانہ

جو ساقیٔ کوثر کے چہرے سے نقاب اٹھے

ہر دل بنے میخانہ ہر آنکھ ہو پیمانہ

دل اپنے چمک اٹھے ایمان کی طلعت سے

کر آنکھیں بھی نورانی اے جلوۂ جانانہ

سرشار مجھے کردے اک جام لبا لب سے

تا حشر رہے ساقی آباد یہ میخانہ

میں شاہ نشیں ٹوٹے دل کو نہ کہوں کیسے

ہے ٹوٹا ہوا دل ہی مولیٰ ترا کاشانہ

سنگِ در جاناں پر کرتا ہوں جبیں سائی

سجدہ نہ سمجھ نوری سر دیتا ہوں نذرانہ

گر پڑ کے یہاں پہنچا مر مر کے اسے پایا

چھوٹے نہ الہی اب سنگ در جانانہ

آباد اسے فرما ویراں ہے دل نوریؔ

جلوے ترے بس جائیں آباد ہو ویرانہ