کون کہتا ہے آنکھیں چرا کر چلے

کون کہتا ہے آنکھیں چرا کر چلے

کب کسی سے نگاہیں بچا کر چلے

کون ان سے نگاہیں لڑا کر چلے

کس کی طاقت جو آنکھیں ملا کر چلے

وہ حسین کیا جو فتنے اٹھا کر چلے

ہاں حسیں تم ہو فتنے مٹا کر چلے

ان کے کوچہ میں منگتا صدا کر چلے

رحمتِ حق ہو ہر دم دعا کر چلے

قصۂ غم سنایا سنا کر چلے

جانِ عیسیٰ دوا دو دعا کر چلے

رب کے بندوں کو رب سے ملا کر چلے

جلوۂ حق وہ ہم کو دکھا کر چلے

من رأنی رأ الحق سنا کر چلے

میرا جلوہ ہے حق جتا کر چلے

جز بشر اور کیا دیکھیں خیرہ نظر

ایّکم مثلی گو وہ سنا کر چلے

جگمگا ڈالیں گلیاں جدھر آئے وہ

جب چلے وہ تو کوچے بسا کر چلے

کیسا تاریک دنیا کو چمکا دیا

سارے عالم میں کیسی ضیا کر چلے

کوئی مانے نہ مانے یہ وہ جانے

سیدھا راستہ وہ سب کو بتا کر چلے

کوڑیوں کوڑھیوں کے لیے کوڑھ دور

اچھا چنگا وہ خاصہ بھلا کر چلے

یاد دامن سے مرجھائی کلیاں کھلیں

فیض سے اپنے غنچے کھلا کر چلے

شب کو شبنم کی مانند رویا کیے

صورت گل وہ ہم کو ہنسا کر چلے

بد سے بد کو لیا جس نے آغوش میں

کب کسی سے وہ دامن بچا کر چلے

جو کمینے تھے ان کو معزز کیا

وہ رذیلوں کو سینے لگا کر چلے

سب کو اسلام کا تم نے بخشا شرف

گرتے پڑتوں کو پیارے اٹھا کر چلے

ایں و آں اور چنیں و چناں سرورا

تیرے در سے سب اپنا بھلا کر چلے

جس کا ثانی ہوا اور نہ ہے اور نہ ہو

وہ عطا کر چلے وہ سخا کر چلے

عمر بھرا عدا ان کو ستایا کیے

اور وہ دشمنوں کی دعا کر چلے

سخت اعدا کو بھی عفو فرما دیا

رحمتِ حق کی شانیں دکھا کر چلے

جس پر نور کا یوں تو سایا نہ تھا

اور پتھر میں نقشے جما کر چلے

مرتے دم سر درِ پاک پر رکھ دیا

اس ادا سے قضا ہم ادا کر چلے

جب قمر اک اشارے سے ٹکڑے کیا

بولے کافر وہ جادو سا کیا کر چلے

معجزوں کو وہ جادو بتاتے رہے

آپ اپنے پہ ظالم جفا کر چلے

جن کو اپنا نہیں غم ہمارے لیے

دوڑے جھپٹے وہ پاؤں اٹھا کر چلے

ابھی میزان پر تھے ابھی پل پر ہیں

پل میں گرتے بچائے بچا کر چلے

سرِ کوثر جو پیاسوں کا شور سنا

پہونچے شربت پلایا پلا کر چلے

کسی جانب سے آئیں ندائیں حضور

مجرموں کی رہائی کا کیا کر چلے

دم میں پہونچے رہائی کا حکم دے دیا

ان کو دوزخ سے پھیرا پھرا کر چلے

داغِ دل ہم نے نوریؔ دکھا ہی دیا

دردِ دل کا فسانہ چھڑا کر چلے