تم واقف حکم خدائے جہاں سلطان الہند غریب نواز

تم واقف حکم خدائے جہاں سلطان الہند غریب نواز

تم کاشف سر نہاں و عیاں سلطان الہند غریب نواز

ہے حکم تمہارا حکم قضا ہر شاہ تمہارے در کا گدا

لا ریب تمہیں ہو شاہ شہاں سلطان الہند غریب نواز

جس شخص کی تم امداد کرو دم بھر میں اسے دلشاد کرو

اس پر ہو سدا فضل رحمٰن سلطان الہند غریب نواز

گردوں کے سدا ہیں جور و ستم آیا ہے شہا میرا ناک میں دم

کب تک میں کروں فریاد و فغاں سلطان الہند غریب نواز

کرتا ہوں اگر عرض مطلب واللہ تو ہوتا ہے سوئے ادب

میرا حال حضور پہ سب ہے عیاں سلطان الہند غریب نواز

جس پر ہو نگاہ لطف و کرم ہو دور سب اس کا رنج و الم

سب پر ہے ترا دنیا میں رواں سلطان الہند غریب نواز

یہ نعیمؔ تیرا ادنیٰ خادم افعال سے اپنے ہے نادم

ترے ہاتھ ہے چارۂ دردِ نہاں سلطان الہند غریب نواز