کیا بتاؤں تم کو آخر کیا سے کیا ان سے ملا

کیا بتاؤں تم کو آخر کیا سے کیا ان سے ملا

دیں ملا ان سے مجھے رب کا پتا ان سے ملا

ہے حقیقت جو بھی دنیا میں ملا ان سے ملا

فضل مولیٰ سے ہمیں رب کا پتہ ان سے ملا

پھول ہے جو خوشبوؤں سے مست، ہے اس کی صدا

مجھ میں خوشبو آئی جب فضل خدا ان سے ملا

مالک جنت نبی ہیں سب پہ روشن ہو گیا

مژدہ دس اصحاب کو جب خلد کا ان سے ملا

ایک مدت سے پریشاں ہوں دیار ہند میں

اے مرے مرغ تخیل اڑ ذرا ان سے ملا

بے زبانوں نے بھی کی سرکار کی حمد و ثنا

جس گھڑی بھی حکم مدحت آپ کا، ان سے، ملا

خود کیا اللہ نے ہے جن کی پاکی کا بیاں

وہ ہیں اہل بیت، ان کو مرتبہ، ان سے ملا

اس زمین و آسماں میں سب ہیں ان سے فیضیاب

لا و رب العرش جس کو جو ملا ان سے ملا

لب پہ پھر آیا نہ ہرگز شکوۂ تشنہ لبی

جب پیالہ ہم کو کوثر کا بھرا ان سے ملا

زہر کھاتا جرم عصیاں پر مگر میں کیا کروں

یہ بھی ارشاد پیمبر خلق کا ان سے ملا

باپ ماں کی خدمتیں واجب ہیں تیرے حکم سے

اور خدمت کا سلیقہ اے خدا ان سے ملا

تم نے کی گستاخی ان کی اس لیے محشر کے دن

نار میں جانے کا تم کو یہ صلہ ان سے ملا

ناز کیوں کر ہو نہ عنبؔر مجھ کو ان کی ذات پر

مجھ کو جو کچھ بھی زمانے میں ملا ان سے ملا