کوئی سمجھے گا کیا تیری فضیلت فاطمہ زہرا

کوئی سمجھے گا کیا تیری فضیلت فاطمہ زہرا

تو ہے میرے نبی کے دل کی چاہت فاطمہ زہرا

مکمل کر نہ پاتیں آپ سجدہ شب گزر جاتی

تھی کتنی آپ کی پیاری عبادت فاطمہ زہرا

اسے جنت نہیں مل سکتی یہ ایمان کہتا ہے

جو رکھے تھوڑی بھی تم سے عداوت فاطمہ زہرا

کہا جب تیرے حق میں مصطفیٰ نے بِضْعَۃُ مِّنِّیْ

بشر جانے بھلا کیا تیری عظمت فاطمہ زہرا

یہی کہہ کر عقیدت کی میں بس تکمیل کرتا ہوں

نبی کا دل، علی کے دل کی راحت فاطمہ زہرا

خدا کے فضل سے مولیٰ علی حسنین کے صدقے

کرانا حشر میں میری شفاعت فاطمہ زہرا

ہماری والدہ، زوجہ، سبھی بہنوں کے سر پر ہو

ہمیشہ ہی تمہارا دستِ شفقت فاطمہ زہرا

صداقت ہو عدالت ہو سخاوت یا شجاعت ہو

سبھی پر ہوتی تھی تیری عنایت فاطمہ زہرا

حیا بھی شرم سے اپنی جبیں خود ہی جھکاتی ہے

کہ تو نے اجنبی دیکھی نہ صورت فاطمہ زہرا

بلاؤں سے بہت ہی دور رہتا ہے اویس عنبرؔ

وہ رکھتا آپ سے ہے سچی الفت فاطمہ زہرا