اہلِ وفا میں نام ہے تنہا حسین کا

اہلِ وفا میں نام ہے تنہا حسین کا

ثانی ہوا ہے کوئی نہ ہوگا حسین کا

صابر تھے ایسے شکوہ نہ آیا زبان پر

یہ دل یہ حوصلہ یہ کلیجہ حسین کا

میدانِ کارِ زار میں اللہ رے نصیب!

زینب تلاش کرتی ہے لاشہ حسین کا

وہ مردہ دل ہیں جن کو نہیں ہے غمِ حسین

زندہ دلوں میں زندہ ہے صدمہ حسین کا

سر سے ردائیں چھین لیں فوج یزید نے

کربل میں لٹ کے رہ گیا کنبہ حسین کا

امت کو میرے نانا کی یارب تو بخش دے

کچھ تھا اگر تو تھا یہ تقاضہ حسین کا

دنیا تو کیا کون و مکاں پر ہو دسترس

پیدا اگر ہو آج بھی جذبہ حسین کا

ہر بار مانگنا میری عادت کے ہے خلاف

یا رب تو ایک بار دے صدقہ حسین کا

قیصرؔ قسم خدا کی وہ حقدار خلد ہے

جو جان و دل سے ہوگیا شیدا حسین کا