قسمت کا سکندر ہوں، مقدر کا دھنی ہوں

قسمت کا سکندر ہوں، مقدر کا دھنی ہوں

میں پنجتنی، پنجتنی، پنجتنی ہوں

پرواہ کسی کی نہیں، ہر اک سے غنی ہوں

وابستۂ دامانِ رسولِ مدنی ہوں

بو آتی ہے حب شہ ابرار کی مجھ سے

میں نافۂ تاتار ہوں، مشکِ ختنی ہوں

دربانئ دربارِ رسالت جو ملے مجھ کو تو میں

جبرئل کا ہم پلہ ہوں، واللہ غنی ہوں

سر شار ازل سے ہوں مئے حبِ علی سے

مستانۂ میخانۂ خیبر شکنی ہوں

درکار ہے مجھ کو نگۂ سیدہ زہرا

میں طالبِ لطف و کرمِ ذوالمننی ہوں

دیکھو نہ حقارت سے مجھے دیکھنے والو

نایاب نگینہ ہوں، عقیقِ یمنی ہوں

کیوں کر نہ کریں رشک سلاطینِ زمانہ

ساجدؔ میں سگِ کوئے حسینی حسنی ہوں