تعالی اللہ ہے کس شان کی سرکار کیا کہنا

تعالی اللہ ہے کس شان کی سرکار کیا کہنا

کہ محبوبِ الٰہی کا ہے یہ دربار کیا کہنا

چراغِ طور ہے روشن کلس روضے کے گنبد کا

برستے ہیں زمیں پر عرش کے انوار کیا کہنا

بشر آنکھیں بچھانے کو ادب سے کیوں نہ جھک جائیں

ملک ہیں دست بستہ حاضرِ دربار کیا کہنا

جو آنکھیں دیکھتی ہیں دل سے کچھ اس کے مزے پوچھو

نگاہوں پر کھلے ہیں پردۂ اسرار کیا کہنا

شرابِ عشق سے لبریزِ عرفاں ساگرِ دل ہے

مے توحید سے آنکھیں بھی ہیں سرشار کیا کہنا

سلامت میکدہ تجھ پر خدا کی رحمتیں ساقی

کھڑے ہیں حوضِ کوثر پر ترے میخوار کیا کہنا

ترے مستوں کی مدہوشی بھی ہشیاری سے اچھی ہے

ترے مدہوش مستی میں بھی ہیں ہشیار کیا کہنا

عوض پھولوں کے لاؤں ڈالیاں بھر کر درودوں کی

پسند آجائیں تو صلِّ علی سرکار کیا کہنا

نہ کیوں دارالشفا سمجھیں ہم اِس دربارِ عالی کو

بدلتا ہے یہاں صحت سے ہر آزار کیا کہنا

یہ اعجازِ مسیحائی کہ حاضر ہوتے ہی در پر

توانا ہے شفقؔ سا ناتواں بیمار کیا کہنا