مرا دل ہی نہیں قرباں، مری جاں ہی نہیں صدقے

مرا دل ہی نہیں قرباں، مری جاں ہی نہیں صدقے

دو عالم آپ پر یا رحمۃ للعالمیں صدقے

ترے الفقر فخری پر شہا میں ہی نہیں قرباں

جنید و شبلی وعطار تاج العارفیں صدقے

جہانِ حسن و خوبی میں نہیں تم سا حسیں کوئی

ترے اس روئے روشن پر تو یوسف سے حسیں صدقے

سواد موئے گیسو پر ترے قرباں شبِ ہجراں

بیاض رخ پہ تیرے صبح کی روشن جبیں صدقے

معطر جن کی خوشبو سے مشامِ جاں ہے اس بو پر

گلاب و عود و صندل نافہ ہائے عنبریں صدقے

لب لعلیں کا صدقہ ہے یہ اعجاز دمِ عیسی

مسیحائی ہو قرباں تم پہ ہوں روح الامیں صدقے

قدِ زیبا پہ ہے آقا ترے سروِ چمن قرباں

ہے طوبیٰ بھی قد دلجو پہ تیرے بالیقیں صدقے

عنا دن ہیں چمن میں خوش بیانی پر ترے شیدا

لبِ شیریں پہ ہیں قند و نبات و انگبیں صدق

تری اس بوریائے خواب راحت پر شہِ عالم

ہزاروں کو کشور و تختِ شہاں تاج و نگیں صدقے

تری اس شانِ عالی کے مناسب ہی نہیں کچھ بھی

کہ ہو تم پر مرے سلطاں مرے اے دل نشیں صدقے

ترا علمِ لدنی باعث صد رشک ہے شاہا

کہ ہیں جس پر علومِ اولین و آخریں صدقے

ہلالِؔ کمتریں جس کی عبادت ہے ثنا تیری

ہوا قربان تم پہ کر کے یہ قلبِ حزیں صدقے