شیخِ عالم قطبِ دوراں حضرتِ پیرِ مجیب

شیخِ عالم قطبِ دوراں حضرتِ پیرِ مجیب

قبلۂ دل کعبۂ جاں حضرتِ پیرِ مجیب

تاجدارِ فقرو عرفاں حضرتِ پیرِ مجیب

نورِ عالم ماہِ تاباں حضرتِ پیرِ مجیب

جانِ جانانِ نبی و آل زہراء وبتول

نورِ چشمِ شاہِ مرداں حضرتِ پیرِ مجیب

کشتیٔ امت کے نگراں نائبِ خیر الانام

ناخدائے قادر یاں حضرتِ پیرِ مجیب

ہر مجیبی میکدہ ہاتھوں میں ہو عرفاں کا جام

جرعہ کش ہوں بادہ خواراں حضرتِ پیرِ مجیب

رشتۂ داغِ جبیں ہو سنگ در سے استوار

ہے یہی اب عہدوپیماں حضرتِ پیرِ مجیب

فتنۂ کافر گروں سے ہم پریشاں ہیں حضور

خوار ہوں یہ فتنہ ساماں حضرتِ پیرِ مجیب

کیسے ہوں محروم ِ فیضان وکرم سے ہم غلام

آپ کا تھامے ہیں داماں حضرتِ پیرِ مجیب

حرمتِ قطبِ بنارس صدقۂ خواجہ عماد

کیجیے مشکل کو آساں حضرتِ پیرِ مجیب

جرعۂ عرفاں کا سائل ہے ہلالِؔ تشنہ کام

آبروئے مئے گساراں حضرتِ پیرِ مجیب