ہے بخشش رب ان کی عطا مانگ ارے مانگ

ہے بخشش رب ان کی عطا مانگ ارے مانگ

ہیں قاسمِ نعمت بخدا مانگ ارے مانگ

قسمت کا دھنی! یہ ہے در شافع محشر

چوکھٹ پہ رگڑ ناک، دعا مانگ ارے مانگ

اس ڈیوڑھی تک آ جانا ہی معراج ہے تیری

تو رشکِ سلاطیں ہے گدا مانگ ارے مانگ

رکھے گی نہ محروم تجھے چشمِ کرم سے

شرمندگیٔ جرم و خطا، مانگ ارے مانگ

صدقہ ملے کچھ خونِ شہیدان وفا کا

اشکوں میں بھی ہو رنگِ حنا مانگ ارے مانگ

سرکار نے فرمایا جنہیں لحمک لحمی

دے واسطۂ آل عبا مانگ ارے مانگ

ہے صدقۂ حسنین کا باڑا یہیں بٹتا

گم صم یونہی کیوں چپ ہے کھڑا مانگ ارے مانگ

سر تا پا گناہوں کے بہت داغ لگے ہیں

ڈھک لے مجھے رحمت کی رِدا مانگ ارے مانگ

بیمارِ معاصی تری مٹی ہو سوارت

ہے خاکِ مدینہ میں شفا مانگ ارے مانگ

لایا ہے نصیب آج یہاں سب کی دعا سے

سب کے لیے تو بھی یہ دعا مانگ ارے مانگ

پیوندِ زمیں کاش مدینہ میں ہو طلحہ

آ جائے یہیں اپنی قضا مانگ ارے مانگ